ရှင်နဲ့ကျွန်မ ဟန်ကျလိုက်တာ

“ဆရာဇေယျာလင်း၏ အလှပဆုံးစကားလုံး ကဗျာဘာသာပြန်နှင့် ရှင်းလင်းချက်စာအုပ်မှ”

ရှင်နဲ့ကျွန်မ ဟန်ကျလိုက်တာ

ရှင်နဲ့ကျွန်မ ဟန်ကျလိုက်တာ
ချိတ်တစ်ချိတ်ဟာ ကွင်းတစ်ကွင်းထဲ ချိတ်လိုက်သလို

ငါးမျှားချိတ်တစ်ချိတ်
ပွင့်နေတဲ့ မျက်စိတစ်ဖက်

မာဂရက် အက်(တ်)၀တ်(ဒ်)
* * * * * * * * * * * * * * * * * * * * * * * * * * * * * * * * * * * * * * *
ကနေဒါမှာ မွေးဖွားတဲ့ စာရေးဆရာမ၊ ကဗျာဆရာမ Margaret Atwood ရဲ့ ထင်ရှားတဲ့ ကဗျာတစ်ပုဒ် ဖြစ်ပါတယ်။ မြင်တဲ့အတိုင်းပဲ၊ ကဗျာဟာ တကယ့်ကို တိုတိုလေးပါ။ (၄)ကြောင်းနဲ့ပဲ ဖွဲ့စည်းထားတာဖြစ်ပါတယ်။ ဒီလေးကြောင်းကဗျာထဲမှာ အချစ်၊ အိမ်ထောင်ရေး၊ မိန်းမ-ယောင်္ကျား ဆက်ဆံရေးကို ပယ်ပယ်နယ်နယ် ထိထိမိမိ “သိပ်” ထည့်ထားတာကို တွေ့ရပါတယ်။

ကဗျာတစ်ပုဒ်လုံးကို ချုပ်ထားတာက “ fit into ” ဆိုတဲ့ ကြိယာပုဒ်ပါပဲ။ “You” ဆိုတဲ့သူနဲ့ “ Me”ဆိုတဲ့သူနဲ့ “ fit into ”ဖြစ်နေတယ်လို့ ကဗျာထဲက ဇာတ်ဆောင်က ပြောပါတယ်။ ဘယ်လို “ fit into ”လဲဆိုတာကို ဒုတိယကြောင်းမှာ ဥပမာအလင်္ကာနဲ့ ပြထားပါတယ်။ “a hook into an eye” ဆိုတဲ့ စကားလုံးကိုပဲ နှစ်ခါသုံးထားတာ တွေ့ရပါတယ်။ ဒီလို နှစ်ခါသုံးတဲ့အတွက် ပထမကြောင်းနဲ့ ဒုတိယကြောင်းကို ချိတ်ဆွဲလိုက်မိသားဖြစ်ပါတယ်။ ဒါကို ဥပမာအလင်္ကာပြတဲ့ “like”ဆိုတဲ့ နှိုင်းယှဉ်ခြင်း စကားလုံးနဲ့ သေချာအောင် ထပ်ချိတ်ပြလိုက်ပါတယ်။

အင်္ဂလိပ်ဘာသာစကားမှာ “hook-and-eye”ဆိုတာ “ချိတ်နဲ့ ကွင်း”ကို ခေါ်တာဖြစ်ပါတယ်။ အထူးသဖြင့် အမျိုးသမီးတွေဝတ်တဲ့ အ၀တ်အထည်တွေမှာ တွေ့ရပါတယ်။ ၀တ်ရင် ချိတ်ကို ကွင်းနဲ့ ချိတ်ရပါတယ်။ ချွတ်ရင် ချိတ်ကို ကွင်းထဲက ဖြုတ်ရပါတယ်။ ချိတ် တစ်ချိန်က (သူ့)ကွင်းတစ်ကွင်းထဲ ချိတ်လိုက်သလို ရှင်ဟာ ကျွန်မကို ချိတ်လိုက်တယ်လို့ ယူဆရင်လည်း ရပါတယ်။ ခက်တာက “fit”ဆိုတဲ့ စကားလုံး။ ဒီကဗျာမှာ ကြိယာ“verb”အနေနဲ့ သုံးထားပါတယ်။ လက်အိတ်ထဲ လက်စွပ်လိုက်သလို ၀င်သွားတယ်။ ဆံ့တယ်။ အံဝင်ခွင်ကျဖြစ်တယ်။ “fit” ဖြစ်တယ်။ “fit” မဖြစ်ဘူးလို့လည်း ပြောကြပါတယ်။ ဥပမာ- အင်္ကျီ၊ ဘောင်းဘီ၊ ဖိနပ် စသဖြင့်ပေါ့။ အသစ်ဝယ်ရင် ၀တ်ကြည့်တယ်။ စွတ်ကြည့်တယ်။ သွင်းကြည့်တယ်။“fit” ဖြစ်တယ် မဖြစ်ဘူးလို့ ပြောပါတယ်။ တော်တယ်၊ မတော်ဘူး၊ ချောင်တယ်၊ ကျပ်တယ် စသဖြင့်ပေါ့။ အဲတော့ ရှင်နဲ့ကျွန်မဟာ အတော်ပဲဆိုတဲ့ အနက်ကောက်လို့လည်း ရပါတယ်။

“hook-and-eye” ချိတ်နဲ့ ကွင်း ဥပမာကို ကြည့်မယ်ဆိုရင် ချိတ်ရှိရင် ကွင်းရှိပြီး ကွင်းရှိရင် ချိတ်ရှိရပါတယ်။ သူ့ ချိတ်နဲ့ သူ့ကွင်း၊ ဒီချိတ်နဲ့ ဒီကွင်းဟာ နှစ်ခုပေါင်းမှ တစ်ခုဖြစ်တယ်။ နှစ်ခုတွဲမှ အလုပ်ဖြစ်တယ်။ အဲ့ဒီလိုပဲ ရှင်နဲ့ကျွန်မဟာ တစ်ယောက်အတွက် တစ်ယောက်ဖြစ်လာတာ။ စိတ်တူ၊ ကိုယ်တူ၊ နှစ်ကိုယ့်တစ်စိတ်သဘော။ တစ်ယောက်နဲ့တစ်ယောက် အဆင်ပြေတယ်။ ဟန်ကျတယ်။ ဟန်ချက်ညီတယ်။ လိုက်ဖက်တယ်။ တင့်တယ်တယ်။ အတွဲညီတယ်ဆိုတဲ့ သဘောတွေလည်း ပါပါတယ်။ ပြီးတော့ ချိတ်နဲ့ကွင်းဟာ “ဖို”သဘောနဲ့ “မ”သဘောကို ဆောင်ကြပါတယ်။ အဲဒါကြောင့် You “ရှင်”ဟာ ယောင်္ကျားဖြစ်ပြီး Me “ကျွန်မ”ဟာ မိန်းမဖြစ်ပါတယ်။ မိန်းမအချင်းချင်း၊ ယောင်္ကျားအချင်းချင်း ပြောနေတာ မဟုတ်ပါဘူး။ မိန်းမတစ်ယောက်က ယောင်္ကျားတစ်ယောက်ကို ပြောနေတာဖြစ်ပါတယ်။ သူစိမ်းမိန်းမတစ်ယောက်က သူစိမ်းယောင်္ကျားတစ်ယောက်ကို ပြောနေတာလည်း မဟုတ်ပါဘူး။ ချိတ်နဲ့ ကွင်းဟာ အတွဲဖြစ်သလို ဒီကဗျာထဲက မိန်းမနဲ့ ယောင်္ကျားဟာလည်း အတွဲဖြစ်ပါတယ်။ ချစ်သူရည်းစား မဟုတ်ရင် လင်မယားဖြစ်ပါလိမ့်မယ်။

ဒီအတွဲဟာလည်း ရှေ့သွားနောက်လိုက် ညီကြတယ်။ တစ်ယောက်နဲ့ တစ်ယောက် အဆင်ပြေတယ်။ လိုက်ဖက်တယ်။ ဟန်ကျတယ်။ အပြန်အလှန်ချစ်ခင်ကြတယ်။ အပြန်အလှန် ချိတ်ဆက်မိတယ်။ တစ်ယောက်အလိုတစ်ယောက်၊ တစ်ယောက်သဘောတစ်ယောက် သိကြတယ်။ သူတို့နှစ်ယောက် အတွဲညီပုံ၊ ဟန်ကျပုံကို ချိတ်နဲ့ကွင်း ဥပမာနဲ့ ပေးထားတယ်။

ဒီကဗျာရဲ့ တတိယနဲ့ စတုတ္ထကြောင်းတွေမှာ ရုတ်တရက် အပြောင်းအလဲ ဖြစ်သွားတာကို တွေ့ရပါတယ်။ နူးညံ့မှု၊ ချစ်ခင်မှု၊ မေတ္တာမျှမှုကနေ ကြမ်းတမ်းမှု၊ ရက်စက်မှု၊ ရိုင်းစိုင်းမှု ဖြစ်သွားပါတယ်။ ချိတ်နဲ့ကွင်း ဥပမာကိုပဲ ပြန်သုံးတာ ဖြစ်ပေမယ့် အဓိပ္ပါယ်ပြောင်းသွားတာ၊ လုံးလုံးလျားလျား ဆန့်ကျင်ဘက်ဖြစ်သွားတာကို တွေ့ရပါတယ်။ “a hook”ကနေ “a fish hook”၊ “an eye”ကနေ “an open eye” ဖြစ်သွားပါတယ်။ မူလ ဥပမာရဲ့ “hook-and-eye” အဓိပ္ပါယ် မရှိတော့ပါဘူး။ ချိတ်ဟာ ငါးမျှားချိတ်ဖြစ်သွားပါတယ်။ “eye”ရဲ့ အဓိပ္ပါယ်ကလည်း “ကွင်း”ကနေ မျက်စိ၊မျက်လုံးအဓိပ္ပါယ် ဖြစ်သွားပါတယ်။ ဒီ ဒုတိယ ဥပမာအလင်္ကာမှာတော့ “ရှင်”နဲ့ “ကျွန်မ”တို့ရဲ့ ဆက်ဆံရေး ပြောင်းလဲသွားပုံကို တွေ့ရပါတယ်။ “ရှင်” ဟာ ငါးမျှားချိတ်တစ်ချိတ်၊ “ကျွန်မ”ဟာ ပွင့်နေတဲ့ မျက်စိတစ်ဖက်။ ငါးမျှားချိတ်ဟာ ပွင့်နေတဲ့မျက်စိတစ်ဖက်မှာ လာချိတ်တယ်။

ငါးမျှားချိတ်ဟာ သက်မဲ့ပစ္စည်း၊ အာရုံခံစားမှု မရှိဘူး။ ခံစားချက်မရှိဘူး။ မသနား မညှာတာဘူး။ စူးတယ်၊ ချိတ်တယ်၊ အသက်ကို သေစေနိုင်တယ်။ မျက်စိဟာ လူ၊ တိရိစ္ဆာန်၊ သက်ရှိသတ္တ၀ါတွေရဲ့ အရေးပါတဲ့အင်္ဂါ အစိတ်အပိုင်း၊ အမြင်အာရုံကို ဖြစ်စေတယ်။ မြင်စေတယ်။ အမြင်ရစေတယ်။ ကန်းသွားရင် ဘယ်လောက်ဆုံးရှုံးနစ်နာမလဲ။ ရှင်ဟာ ငါးမျှားချိတ်၊ ကျွန်မဟာ ပွင့်နေတဲ့ မျက်စိတစ်ဖက်။ အံကိုက်ပဲ။ “fit” ပဲ။ ကြင်နာမှုဟာ နာကျင်မှု ဖြစ်ခဲ့ရပြီ။ တအားကြီးနီးပြီးမှ ခါးသီးခဲ့ရပြီး နိုင်လိုမင်းထက် အကြမ်းဖက်မှုမှာ တုန်လှုပ်ချောက်ချားသွားရပြီ။
* * * * * * * * * * * * * * * * * * * * * * * * * * * * * * * * * * * * *
“YOU FIT INTO ME”

you fit into me
like a hook into an eye

a fish hook
an open eye

Margaret Atwood