ရေးသားသူ — ခန့်နေသူတိုး
တကယ်သင်ယူချင်တဲ့စိတ်သာ ရှိမယ်ဆိုရင် အာရုံစုစည်းမှုလေးကို နဲနဲ အားစိုက်လိုက်တာနဲ့ ကျနော်တို့ရဲ့ လက်တစ်ကမ်း အနီးအနား ပါတ်ဝန်းကျင်မှာကိုပဲ သင်ယူစရာတွေက တစ်ပုံတစ်ပင်ကြီး ရှိနေတာကို မြင်တွေ့နိုင်ကြရမှာပါ။ ဟိုး တစ်နေ့က အကြောင်းလေး တစ်ခုကို ပြန်လည်မျှဝေပါရစေ ။
မြန်မာညီငယ် နှစ်ယောက် ကျနော်နဲ့ တွေ့ချင်တယ်လို့ ခွင့်တောင်းလာပါတယ်။ သူတို့က ဆိုးလ် အစ်ဆန်ဖက်က ပြောင်းလာတာ။ အလုပ်ထွက်ခွင့်ရလို့ အလုပ်ရှာနေချိန် ၃လအတွင်းမှာ သူတို့ရဲ့ ကိုက်နေတဲ့ သွားတွေကို ပြုပြင်ဖာထေးမှု လုပ်ချင်တယ် .. အဲဒီအတွက် ဘယ်လိုဆေးခန်းမျိုးသွားရင် အဆင်ပြေမလဲ .. ဘယ်လောက် ကုန်ကျနိုင်သလဲ .. ဒါလေးတွေ သိချင်လို့ ။ ပြီးတော့ ဘူဆန်ဖက်ရောက်လာတော့ ကျနော့်ကိုလည်း တွေ့ဆုံ ဂါရဝပြုရင်း ညနေခင်းစာလေးလည်း ဧည့်ခံချင်လို့ပါတဲ့။ ကျနော်ကလည်း ဒီလို ရှားရှားပါးပါး ဂါရဝပြုချင်တယ်လို့ တောင်းဆိုလာတော့ ပြုံဖြီးဖြီးကြီးနဲ့ သဘောတွေခွေ့ကျေနပ်ပြီး ချက်ခြင်းကိုပဲ “ဒီညနေ တွေ့ကြမယ်လေ” ဆို လက်ခံလိုက်ပါတယ်။ ညနေကျတော့ တွေ့ကြတယ်ပေါ့။
တစ်ယောက်က ညာဖက် အောက်အံသွား နာနေတယ်။ နောက်တစ်ယောက်ကတော့ ဘယ်ဖက် အပေါ်အံသွား အခေါင်းဖြစ်ပြီး ပေါက်နေတယ်။ “ရေတောင်သောက်လို့ မရဘူးအကို .. နဲနဲလေး အေးတာနဲ သွားတွေက ကျင်ပြီး နာလာတယ်” ။ နှစ်ယောက်ထဲက တစ်ယောက်က ပြောတဲ့စကား ။ ဒီစကားကို ကျန်တဲ့ တစ်ယောက်က လက်ထဲက မော့လက်စ ဘီယာခွက်ကို စာပွဲပေါ် ပြန်ချလိုက်ရင်းက “ဟုတ်တယ် အကို ကျနော်လည်း အဲလိုပဲ” လို့ ထောက်ခံလိုက်ပါတယ်။ သူတို့စကားကို နားထောင်ရင်း ကျနော်လည်း တော်တော်လေး အံသြသွားတယ် ။ ဒါနဲ့ “ နေပါအုံး .. ရေသောက်တော့ ကျင်တယ်နာတယ် .. အခု ဒီလောက်အေးတဲ့ ဘီယာကျတော့ ဘယ်လိုသောက်လို့ ရသတုန်း .. မကျင်ဘူးလား မနာဘူးလား” လို့ မေးလိုက်တော့ ပထမတစ်ယောက်က “အာ .. အကိုကလည်း ဒီလိုမျိုးလေး နာနေတဲ့ သွားကို လျှာလေးနဲ့ ကာဗာလုပ် ပိတ်ထားရင်း သောက်ရတာပေါ့ .. ဟဲဟဲ ” ဆို သောက်ပြပါတော့တယ်။ ဒါကို နောက်တစ်ယောက်ကလည်း “ဟုတ်တယ် .. ဟုတ်တယ် .. ကျနော်ရောပဲ” လို့ ထောက်ခံရင်း လိုက်သောက်ပါတယ်။ ကျနော်လည်း အူကြောင်ကြောင်နဲ့ ကျနော့်အရှေ့က ဘီယာခွက်ကို ကောက်မော့ရင်း ကောင်းနေတဲ့ ကျနော့်သွားတွေရဲ့ အပေါ်အောက် ဘယ်ညာတွေကို လျှာနဲ့ တစ်လှည့်စီ ပြောင်းပြောင်းပြီး လိုက်ပိတ်ရင်း သူတို့ပြောတာ ဟုတ်မဟုတ် စမ်းကြည့်မိပါတယ်။ အင်း ဖြစ်တော့ ဖြစ်နိုင်တယ် ။ ဒါနဲ့ ဘီယာဆိုင်က စားပွဲထိုးတဲ့ မိန်းခလေးကို ရေတစ်ခွက်ပေးပါဆို တောင်းပြီး သူတို့နှစ်ယောက်ကို သောက်ခိုင်းကြည့်ပါတယ် ။ “အကိုရယ် ရေက အရသာမှ မရှိတာ .. မဖြစ်လို့သာ သောက်နေရတာ .. သောက်တိုင်းလည်း လျှာနဲ့တော့ ဘယ်ပိတ်ထားနိုင်မှာလဲ .. ကျင်တာပေါ့ အကိုရယ် .. အား ကျွတ်ကျွတ်ကျွတ်” ဆိုပြီး ငြီးတွားကြပါတယ်။
အဲဒီမှာပဲ ကျနော့်ခေါင်းထဲမှာ လင်းကနဲ တစ်ချက်ဖြစ်သွားပါတယ်။ ဟုတ်တယ် .. ငါတိုတစ်တွေ ဖြစ်ချင်တဲ့ ဆန္ဒနဲ့ လိုချင်တောင့်တမှုတွေသာ ပြင်းပြမယ်ဆိုရင် ဘယ်လိုအဆင်မပြေမှု ဘယ်လိုဒုက္ခနဲ့ ကြုံတွေ့နေရပါစေ ကျော်လွန်ဖြတ်သန်းဖို့ နည်းလမ်းကောင်းတွေ သုံးပြီး ကျော်လွှားနိုင်ကြတယ် ဆိုတာပါပဲ ။ တစ်ကယ်လို့ ဒုက္ခတစ်ခုကို ငါတို့ မကျော်လွှားနိုင်ဘူးဆိုရင် .. ဒါဟာ အဲဒီ ဒုက္ခရဲ့ အခြားတစ်ဖက်က ပန်းတိုင်အပေါ် လိုချင်တောင့်တမှု ဆန္ဒ နဲပါးလို့ပဲဖြစ်တယ် .. ဆိုတဲ့ အတွေးတစ်ခု ရရှိလိုက်ပါတော့တယ် ။ ဒါပေမယ့် ဒီအတွေးဟာ အားလုံးမှန်တဲ့ အမှန်တရားတော့ မဟုတ်ပါဘူး ။ ရှိသမျှ သွားတွေ အားလုံးနာကျင်ကိုက်ခဲနေသူ မြောက်များလှစွာသော ဒုက္ခပေါင်းစုံနဲ့ ကြုံနေရသူတွေ အတွက်တော့ အကျုံးမဝင်နိုင်ပါဘူး။
နိဂုံးချုပ်အနေနဲ့ ကိုရီးယားနိုင်ငံကို များစွာသော လူတွေထဲကမှ လာရောက်ခွင့် ရရှိပြီးနောက် အခက်အခဲ ဒုက္ခနဲ့ ကြုံတွေ့နေရတဲ့ ကိုယ်ညီအကိုတွေအတွက် ကျနော်ရရှိခဲ့တဲ့ ဒီ အတွေးလေးကို ပြန်မျှပါတယ်ဗျာ ။ ကိုယ့်ဒုက္ခဟာ အကြီးကြီးလား သေးသေးလေးလား .. ဆန်းစစ်ပါ ။ ကြုံလာတဲ့ ဒုက္ခထက် ရလဒ်ပန်းတိုင်အပေါ်ကို ပြင်းပြတဲ့တောင့်တမှု ထားကြပါလို့ .. တိုက်တွန်းရင်း .. ဘူဆန်ဖက်ရောက်ရင်လည်း ဘီယာလေးဘာလေး ဝယ်တိုက်ကြပေါ့ ။
No comments:
Post a Comment