ပြတင်းပေါက်တစ်ခုနဲ့လူ

စာရေးဆရာ - မြင့်မိုးအောင်

၁

ကျွန်တော့်ရဲ့ အခန်းကျဉ်းလေးထဲမှာ ပြတင်းပေါက်တစ်ခုရှိနေတယ်။
ပြတင်းပေါက်လို့သာ ဆိုလိုက်ရပေမယ့်
တစ်ကယ်တော့၊ ပြတင်းပေါက်နဲ့ သိပ်မတူလှပါဘူး။
တစ်ခြားသူတွေအတွက်တော့ သူတို့ရဲ့ပြတင်းပေါက်လေးတွေဟာ၊
သိပ်ပြီးတော့ ချစ်စရာကောင်းကြပေလိမ့်မယ်။
သူတို့အတွက် အကောင်းဆုံးလက်ဆောင်တွေကိုလည်း
အဲဒီ ပြတင်းပေါက်ကလေးတွေကပဲ ယူဆောင်လာတတ်ကြတယ်။
တစ်ခါတစ်ရံ၊
ရွှေရောင်တောက်ပတဲ့ နေခြည်တန်းလေးတွေကို ယူဆောင်လာကြတယ်။
တစ်ခါတစ်ရံ၊
သိပ်ပြီးလတ်ဆတ်တဲ့ နှင်းဆီပန်းနံ့လေးတွေကိုလည်း ယူဆောင်လာကြတယ်။
တစ်ခါတစ်ရံ၊
ဟိုးအဝေးက မိုးတိမ်လေးတချို့ကိုတောင် မျှားခေါ်လာတတ်ကြတယ်။



၂

ဒါပေမယ့်၊ ကျွန်တော့်ရဲ့ ပြတင်းပေါက်ကတော့ အဲဒီလိုမဟုတ်ဘူး။
သူရဲ့တံခါးရွက်တွေကို အချိန်ပြည့်ပိတ်ပြီး၊
ကျွန်တော့်ကို မွန်းကျပ်နေအောင် အကျဉ်းချထားတတ်တယ်။
ပြီးတော့၊ ကျွန်တော်နေထိုင်တဲ့ ဒီအခန်းကျဉ်းလေးကိုပဲ လှပခမ်းနားစေဖို့
အမြဲတမ်း ပြင်ဆင်မွမ်းမံခိုင်းတော့တာပါပဲ။
သူက၊ ဒီအလုပ်တစ်ခုသာ
ကမ္ဘာလောကရဲ့ မြင့်မြတ်ခမ်းနားတဲ့ အလုပ်တစ်ခုလို့
အခိုင်အမာ ယုံကြည်ထားတယ်။
ဒီတော့၊ အခန်းနံရံတွေပေါ်မှာ၊ အညစ်အကြေးလေးတစ်ခု စွန်းထင်းသွားတာနဲ့
ကျွန်တော့်ကို ဆူပူကြိမ်းမောင်းတော့တာပဲ။
မကြာခဏဆိုသလိုပဲ
အခန်းနံရံတွေကို ဆေးရောင်အသစ်တွေနဲ့ ပြန်သုတ်ခိုင်းတတ်တယ်။
ကျွန်တော့်ရဲ့ အခန်းနံရံတွေဟာ
ဒီဆေးရောင်တွေကြောင့် တကယ်ပဲ လှပခမ်းနားပါပေရဲ့။
သူ့ရဲ့ တံခါးရွက်တွေပိတ်ထားလို့၊
အလင်းဝင်ပေါက်တစ်ခုမှမရှိတဲ့ ကျွန်တော့်ရဲ့အခန်းကျဉ်းလေးဟာ
ဒီဆေးရောင်တွေကြောင့်ပဲ အမြဲတမ်းလင်းလက်တောက်ပနေခဲ့တယ်။
ဒါပေမယ့်၊ သူ့စိတ်ကြိုက်အရောင်တွေရဖို့ ဆိုတာကတော့
ကျွန်တော့်အတွက် သိပ်ပြီးခက်ခဲမွန်းကျပ်တဲ့ အလုပ်တစ်ခုပါပဲ။


၃

တစ်ခါတစ်ရံတော့ သူ့ရဲ့တံခါးရွက်တွေကိုဖွင့်ပေးဖို့
ကျွန်တော်က တောင်းဆိုမိတတ်တယ်။
အဲဒီအခါမျိုးမှာ သူက ဒေါသတကြီးပေါက်ကွဲတော့တာပါပဲ။
တစ်ခါတုန်းက၊ နီရဲတဲ့မျက်လုံးတစ်စုံနဲ့ ကျွန်တော့်ကိုစိုက်ကြည့်ခဲ့ဖူးတယ်။
တစ်ခါတုန်းက၊ အခန်းကျဉ်းထဲက အောက်ဆီဂျင်တွေကို အပြင်လွှင့်ပစ်ခဲ့ဖူးတယ်။
တစ်ခါတုန်းက ဒီထက်ကျဉ်းတဲ့အခန်းတစ်ခုထဲမှာ
ပြတင်းပေါက်မရှိဘဲထားမယ်လို့ ခြိမ်းခြောက်ခဲ့ဖူးတယ်။
ဒါပေမယ့် တချို့အချိန်တွေမှာတော့
ကျွန်တော်နဲ့ အေးအေးဆေးဆေး စကားတွေပြောနေခဲ့ပြန်တယ်။
ဒီအခန်းကျဉ်းလေးကို ခမ်းခမ်းနားနားပြင်ဆင်ထားသင့်တဲ့အကြောင်း
အကျိုးအကြောင်းခိုင်ခိုင်လုံလုံနဲ့ ရှင်းပြနေတတ်တယ်။
ဒါကြောင့်လည်း၊ ဒီအလုပ်တွေကို ကျွန်တော်ကိုယ်တိုင် စိတ်ပါလက်ပါနဲ့
ဒီလောက်နှစ်တွေအများကြီး လုပ်ကိုင်နေခဲ့မိတာပေါ့။


၎

မကြာသေးခင်ကတော့ ထူးခြားမှုတစ်ခု ပေါ်ပေါက်လာခဲ့တယ်။
ကျွန်တော့်မှာ ကွက်လပ်တစ်ခု ဖြစ်ပေါ်လာတာကို
ပထမဆုံး သတိထားလိုက်မိတယ်။
နောက်တော့ ဒီကွက်လပ်က
ကျွန်တော့်ခန္ဓာကိုယ်ကို တဖြည်းဖြည်းနဲ့ လှိုက်စားလာခဲ့တယ်။
ဒီကွက်လပ်ကြောင့်ပဲ
ကျွန်တော့်ရဲ့အလုပ်မှာလည်း မှားယွင်းမှုတွေနဲ့ ကြုံတွေ့လာခဲ့ရတယ်။
သူ့ကို ဘယ်အရာနဲ့ အစားထိုးရမယ်ဆိုတာ ကျွန်တော်မသိဘူး။
ကျွန်တော့်အခန်းကျဉ်းလေးထဲက အရာအားလုံးနဲ့ ဖြည့်ကြည့်ပေမယ့်လည်း
အဲဒီကွက်လပ်ဟာ ပိုပြီးတော့သာ ကျယ်ပြန့်လာခဲ့တယ်။
ကျွန်တော်နဲ့ နှစ်ပေါင်းများစွာ ဝေးကွာနေတဲ့ အပြင်လောကမှာ
ဒီကွက်လပ်အတွက် တစ်စုံတစ်ခုများ ရှိနေမလား။
‘ခင်ဗျားရဲ့ တံခါးရွက်တွေကို ခဏလောက်ဖွင့်ပေးပါ‘
ကျွန်တော်က ပြတင်းပေါက်ကို တောင်းဆိုလိုက်မိတော့တယ်။


၅

‘ဒီလောက်ခမ်းနားတဲ့ အခန်းတစ်ခုကို ပိုင်ဆိုင်နေရက်နဲ့
မင်းကဘာကို လိုအပ်နေရတာလဲ‘
‘ဒီခမ်းနားတဲ့ နံရံတွေကလည်း တခြားနံရံတွေလိုပဲ
ကျွန်တော့်ကို မွန်းကျပ်စေတာပဲ‘
ဒီအဖြေကြောင့်
သူက ကျွန်တော့်ကို ဒေါသတကြီးနဲ့ စူးစူးရဲရဲစိုက်ကြည့်လိုက်တယ်။
အခု ကျွန်တော်ခံစားနေရတာက သူ့ရဲ့ဒေါသထက်ကြီးမားနေတယ်ဆိုတာ
သူ မသိသေးဘူးထင်ပါရဲ့။
‘အပြင်မှာ မုန်တိုင်းတစ်ခု တိုက်ခတ်နေတယ်။
ငါ့ရဲ့ တံခါးရွက်တွေကို မဖွင့်နိုင်သေးဘူး။‘
‘ခင်ဗျားမညာပါနဲ့၊ ကျွန်တော် ဒီထက်ဆိုးသွားနိုင်တယ်။
ခင်ဗျားမတွေ့ဘူးလား၊
ဒီကွက်လပ်က ကျွန်တော့်ကို သဲသဲမဲမဲစားသောက်နေတာ၊‘
ကျွန်တော့် ခန္ဓာကိုယ်ပေါ်က၊ ဒဏ်ရာကိုတွေ့လိုက်တဲ့အခါမှာတော့
သူတကယ်ပဲ တုန်လှုပ်သွားတော့တယ်။
ကျွန်တော့်ရဲ့ အခန်းနံရံတွေ ဆေးရောင်မညီမညာနဲ့
အရုပ်ဆိုးနေရတဲ့အကြောင်းကို သူသိသွားခဲ့ပြီပေါ့။
‘ခင်ဗျားရဲ့ တံခါးရွက်တွေကို ဖွင့်လိုက်ပါ။
မိုးတိမ်လေးတစ်ခု၊ ဒါမှမဟုတ် သစ်ရွက်ကြွေလေးတချို့နဲ့
ဒီကွက်လပ်ကို ဖြည့်ကြည့်ပါရစေ။‘
သူ အချိန်အတော်ကြာ တွေဝေနေခဲ့တယ်။
‘ဒါမှမဟုတ်ရင်တော့ ဒီအခန်းနံရံတွေကို
ကျွန်တော် ဖျက်ဆီးပစ်မိလိမ့်မယ်။‘


၆

ဒါ၊ ကျွန်တော့်ရဲ့ နောက်ဆုံးလက်နက်ပါပဲ။
ဒီအခန်းနံရံတွေ ပျက်စီးသွားမှာကိုတော့ သူလက်ခံနိုင်မယ် မဟုတ်ပါဘူး။
ဒီစကားကြောင့် သူ ကျွန်တော့်ကို မုန်းတီးသွားခဲ့ပြီ ထင်ပါရဲ့။
ဒါပေမယ့်၊ မကြာခင်မှာပဲ သူ့ရဲ့တံခါးရွက်တွေကို ဖွင့်ပေးလိုက်တော့တယ်။
ဒီနောက်တော့၊
ကျွန်တော် မကြာခဏအိပ်မက်နေခဲ့တဲ့ အပြင်ကမ္ဘာလောကဟာ
သူရဲ့ကျယ်ပြန့်တဲ့ရင်ခွင်မှာ ကျွန်တော့်ကို လွတ်ထွက်မသွားစေဖို့
တင်းတင်းကြပ်ကြပ် ပွေ့ဖက်ထားတော့တယ်။
ဒီအချိန်မှာပဲ၊ ပြတင်းပေါက်ရဲ့ နောက်ဆုံးစကားတစ်ခွန်းက
ကျွန်တော့်ကို တုန်လှုပ်သွားစေတယ်။
‘မင်းဟာ၊ လူတစ်ယောက်တော့ ဖြစ်နေပြီ။
ဒါပေမယ့်၊ ပြတင်းပေါက်တစ်ခုတော့ ဖြစ်ဖို့မလွယ်သေးဘူး။‘

ဆရာမြင့်မိုးအောင်၏ အမဲလိုက်အက စာအုပ်မှ ကူးယူဖော်ပြပါသည်။