ကိုရီးယားနိုင်ငံရောက်မြန်မာများအတွက် ဒီဇိုင်းရေးဆွဲနည်းသင်တန်းဖွင့်မည်

ကိုဝိုင်း(မိုးညှင်း)
ဆောအူးလ် ၊ စက်တင်္ဘာ ၁ ။

ဘူချောန်းရွှေ့ပြောင်းအလုပ်သမားရိပ်သာ(BMWH) ၊ မြန်မာအသင်း(ကိုရီးယား)နှင့် ၊ ကိုရီးယားနည်း ပညာတက္ကသိုလ်-၂ (Korea Poly-Technic College-2) တို့ ညှိနှိုင်းချက်အရ ၊ ကိုရီးယားနိုင်ငံရောက် မြန်မာအလုပ်သမားများအတွက် ၊ အသက်မွေးမှု အတတ်ပညာ အထောက်အကူပြု အစီအစဉ်အဖြစ် ၊ အဆောက်အဦး ဒီဇိုင်းနှင့် စက်ပစ္စည်း ကိရိယာများ ဒီဇိုင်းရေးဆွဲနည်းပညာဟု ခေါ်ဆိုနိုင်သည့် AUTO CAD နှင့် UNI Graphic ပညာတို့ကို အခမဲ့ သင်ကြား ပို့ချ ပေးသွားမည် ဖြစ်ကြောင်း သိရသည် ။

သင်တန်းချိန်မှာ အပတ်စဉ် တနင်္ဂနွေနေ့ မွန်းလွဲ ၁၂ နာရီခွဲမှ ညနေ ၆ နာရီ အထိဖြစ်ပြီး ၊ သင်တန်း ကာလမှာ ၂၀၀၉ စက်တင်္ဘာလ ၁၃ ရက်မှ နိုဝင်္ဘာလ ၁ ရက်နေ့ထိ ရက်သတ္တပတ် ၈ ပတ် ကြာမည် ဖြစ်ကြောင်း ၊ ရက်သတ္တ ၈ ပတ်တွင် အောက်တိုဘာလ ၄ ရက်နေ့ ချူးဆောက် ပွဲတော်ပိတ်ရက် နှင့် ၊ ဘူချောန်းမြို့တော် ယဉ်ကျေးမှုပွဲတော် (We Love Bucheon Festival) ကျင်းပမည့် စက်တင်္ဘာလ ၂၇ ရက် တနင်္ဂနွေ ၁ ရက် စုစုပေါင်း တနင်္ဂနွေ၂ ရက်တို့တွင် သင်တန်းနားမည်ဖြစ်ကြောင်း နှင့် သင်တန်းကို ဆုံနယ်ဘူတာ(Songnae Station) အနီးရှိ ကိုရီးယားနည်းပညာတက္ကသိုလ်-၂ (KPC-2) တွင် ပို့ချမှာဖြစ်ပြီး ၊ ပါမောက္ခနှင့်အတူ အဆိုပါတက္ကသိုလ်မှ ဘွဲ့ရကျောင်းသားများက လက်ထောက်ဆရာများအဖြစ် အနီးကပ် ကြီးကြပ် ပို့ချ ပေးမည်ဟု ဆိုသည် ။

သင်တန်း တက်ရောက်လိုသူများ 010-2331-2457 နှင့် 010-8356-3131 တို့ထံ စက်တင်္ဘာလ ၁၀ ရက်နေ့ ညနေ ၆နာရီ နောက်ဆုံးထား ဆက်သွယ် စာရင်းပေးသွင်းနိုင်ကြောင်း ၊ သင်တန်းကို ကိုရီးယား - အင်္ဂလိပ် နှစ်ဘာသာဖြင့် ပို့ချမှာ ဖြစ်ကြောင်း ၊ သင်တန်းသား အရေအတွက် ကန့်သတ်မှု ရှိပါသဖြင့် ၊ မိမိကြောင့် အခြားသူများ နစ်နာမှု မရှိစေရေး (သူတစ်ပါး မနစ်နာစေရေး) အတွက် သင်တန်း အမှန်တကယ် တက်ရောက်နိုင်မည့် အခြေအနေရှိမှသာ စာရင်းပေးသွင်း ကြပါရန် သင်တန်းသား စုဆောင်းသူများက မေတ္တာရပ်ခံ နှိုးဆော်ထားကြောင်းလည်း သိရသည် ။