မြန်မာ အီးပီလုပ်သားလောင်းတစ်ဦးရဲ့ အိတ်ဖွင့်ပေးစာ

ရေးသားသူ — မြသူအောင်

ကူညီပေးပါခင်ဗျား...
လေးစားစွာဖြင့် စာရေးကြားအပ်ပါသည်။
ကျွန်တော်က 2008 ခုနှစ်က ပထမအကြိမ်ပြုလုပ်သော ကိုရီးယား အလုပ်အကိုင် EPS-TOPIK စာမေးပွဲ အောင်မြင်ထားသောသူ တစ်ယောက်ဖြစ်ပါသည်။

ကျွန်တော်တို့သည် 2006 ခု EPS စနစ်အရ နှစ်နိုင်ငံ MOU လက်မှတ်မထိုးခင်အချိန်ကစပြီး ကိုရီးယားသို့ သွားရောက်လုပ်ကိုင်ခွင့် ရရှိရန် စောင့်ဆိုင်းနေကြသူများဖြစ်ကြောင်း ၊ အကြောင်းအရင်းမှာ ကျွန်တော်တို.သည် 2010 ခု 10 လပိုင်းက ဒုတိယနှစ်အတွက် မြန်မာလုပ်သား 1771ဦး က အလုပ်လျှောက်လွှာ ပြန်လည် တင်ခဲ့ကြပါသည်။

ယခု 1700 နီးပါးက ကိုရီးယားတွင် အလုပ်လုပ်နေခွင့်ရရှိခဲ့ပြီး ကျွန်တော် အပါအ၀င် မြန်မာလုပ်သား လူဟောင်း ၉၂ ယောက်သာ ကျန်တော့သည်ဟု အစိုးရပြည်ပအလုပ်အကိုင်အေဂျင်စီမှ ပြောကြားပါသည်။ ဒု-အကြိမ် စာမေးပွဲ အောင်မြင်ထားပြီး ဇူလိုင်လမှာ အလုပ်လျှောက်လွှာတင်သူ အသစ် 4110 ယောက်မှာ ယခု နှစ်ပတ်အတွင်း Calling ရရှိခဲ့သူပေါင်း အယောက် 200 ကျော်ရှိသွားပါပြီ။

ထိုအထဲတွင် လူဟောင်းတယောက်မျှ မပါဝင်ခဲ့ပါ။ ကျန်နေသေးသော လူဟောင်းများနှင့် ပတ်သက်သော အခြေနေကို သိချင်ပါသည်။
အစိုးရပြည်ပအလုပ်အကိုင်အေဂျင်စီမှ ကျန်နေသေးသော လူဟောင်းများတွင် အချက်အလက် ကွဲလွှဲနေသူ ၄၈ဦးရှိကြောင်း ၊ ထို့ကြောင့် ရွေးချယ် မခံရတာဖြစ်ကြောင်း ပြောပြသော်လည်း ကျန်လူများ ဘာကြောင် calling မရရှိတာကို ရှင်းလင်း တိကျစွာ ပြောပြခြင်းမရှိဘဲ ၊ လူဟောင်း ၉၂ယောက် စာရင်းကို ဒု-၀န်ကြီးက လက်မှတ်ထိုးပြီး ကိုရီးယားဘက်သို့ 8/8/2011နေ့က ပြန်ပို့ ထားကြောင်း ပြောပြပါသည်။

ကျနော့် အထင် လူဟောင်း ၉၂ ယောက်အချက်အလက်တွေက ကိုရီးယားမှာ မရှိလို့ ရွေးချယ် မခံရတာထင်ပါသည်။

ကိုမင်းဆွေမှ အခြေနေမှန်ကို စုံစမ်ပေးပြီး ကျနော်တို့ ဘာလုပ်ရင် ကောင်းမလဲဆိုတာ အကြံပေးစေလိုပါသည်။ စာမေးပွဲသက်တမ်း ကာလမှာ 2011 ခု 10 လပိုင်းမှာ ကုန်ဆုံးတော့မည် ဖြစ်သောကြာင့် ကိုရီးယားသို့သွားပြီး အလုပ်လုပ်ဖို့ အခွင့်အရေးက အရမ်းနည်းပါးသွားခဲ့ပြီ ဖြစ်ပါသည်။

감사하게 부탁합니다.
먀투아웅 드림
=================
မှတ်ချက်လေးပေးလိုက်ပါရစေ
“ လူဟောင်း ၉၂ ယောက်အချက်အလက်တွေက ကိုရီးယားမှာ မရှိလို့ ရွေးချယ် မခံရတာထင်ပါသည်” ဆိုတဲ့ ကိုမြသူအောင်ရဲ့ ထင်မြင်ယူဆချက် မှန်လိမ့်မယ်လို့ သဘောရပါတယ် ။ သြဂုတ်လ ၈ ရက်နေ့က လူဟောင်း ၉၂ ယောက်စာရင်းကို ပြန်ပို့ထားပြီဆိုတဲ့ အချက်မှန်ခဲ့မည်ဆိုပါက ၊ လူဟောင်းများလည်း မကြာခင် အရွေးခံရလိမ့်မယ်လို့ ထင်ပါတယ် ။ ကိုရီးယားဘက်မှ ခုံနံပါတ်အစီအစဉ်အလိုက် ခေါ်စာ ပို့နေခြင်းမဟုတ်ဘဲ ၊ ကိုရီးယားလုပ်ငန်းရှင်က ကြိုက်သူများကိုသာ ရွေးချယ် ခေါ်ယူနေခြင်းဖြစ်သည့်အတွက် ၊ ကံဆိုးကံကောင်း ကိုရီးယားလုပ်ငန်းရှင်နှင့် ဖူးစာဆုံသူများ မြန်မြန်အရွေးခံရလိမ့်မယ်လို့ ထင်ပါတယ် ။ ကိုရီးယားကို အရင်ရောက်လာတိုင်းလည်း ကောင်းလိမ့်မယ်လို့ ပြောလို့မရသမို့ နောက်ကျလေ ကောင်းလေပါပဲလို့ တွေးပြီးသာ ဖြေပါတော့ ကိုမြသူအောင် ။ ကိုမြသူအောင်နှင့် အသင့်တော်ဆုံး အလုပ်မရှိသေးလို့ အရွေးမခံရသေးတာဖြစ်လိမ့်မယ်လို့ ထင်ကြောင်းပါခင်ဗျား ။

အားလုံးအဆင်ပြေကြပါစေလို့ ။

လေးစားမှုဖြင့် -
ကိုဝိုင်း (မိုးညှင်း)