ကိုရီးယားအီးပီစနစ် မြန်မာ ဘယ်နှယောက်ခေါ်မလဲ

မေးစရာရှိလို့

အစ်ကို ကျွန်တော် တတိယအကြိမ် eps topik ကို အောင်ပြီး
အလုပ်လျှောက်လွှာ တင်ထားတာပါ. 2012 ဒုတိယ 6လပတ်မှာ ခေါ်မယ်
နိုင်င်္ငခြား အလုပ်သမား 14100 ထဲမှာ မြန်မာပြည်ကို
ဘယ်လောက်လောက်ခေါ်မှာလည်းဗျ. ဘယ်လထဲလောက် အပြတ်ခေါ်မှာလည်းဗျ..
ကျေးဇူးပြုပြီးး ဖြေပေးပါဦး ။
အီးပီခွဲတမ်းဆိုတာ

ကိုရီးယား အီးပီစနစ်မှာ ဘယ်နိုင်ငံက ဘယ်နှယောက်ခေါ်မယ်ဆိုပြီး အစိုးရက ကြိုတင်ဆုံးဖြတ် ခွဲတမ်းချ ထားတာ မရှိပါ ။ ကိုရီးယား လုပ်ငန်းရှင်တွေရဲ့ လိုအပ်ချက်အရ ခေါ်ယူစေခြင်းဖြစ်ပါတယ် ။ ဒါကြောင့် မြန်မာအလုပ်သမား ခေါ်ယူလိုတဲ့ ကိုရိးယားလုပ်ငန်းရှင် များရင်များသလောက် မြန်မာများများ ခေါ်ယူခိုင်းစေခံရဖွယ်ရာရှိပါလိမ့်တယ် ။
အရင်ရောက်နေတဲ့ မြန်မာတွေရဲ့ လုပ်ရပ်အပေါ် နှင့် နိုင်ငံရေးအခြေအနေ ပေါ်မူတည်မယ်လို့ထင်ပါတယ် ။ ကိုရီးယား လုပ်ငန်းရှင်တွေအကြား မြန်မာလေးတွေ ခိုင်းကောင်းတယ် ၊ ပေးတာယူ ခိုင်းတာလုပ် ဘာမှပြန်မပြောတဲ့သူများရင် များသလောက် မြန်မာအလုပ်သမားများများ ခေါ်ယူခိုင်းစေခံရဖွယ်ရာ ရှိပါလိမ့်မယ်လို့ သဘောရပါတယ် ။
ကိုရီးယား သူဌေးတွေက မြန်မာ မခေါ်လိုပါဘူး ဆိုလျင် ကိုရီးယား အစိုးရက လုပ်ပေးချင်သည့်တိုင် လုပ်ပေးလို့မရပါ ။
လုပ်သားခေါ်တဲ့စနစ်ကသည်လိုပါ

ကိုရီးယားလုပ်ငန်းရှင်တစ်ယောက်က နိုင်ငံခြားသား အီးပီလုပ်သားအသစ် တစ်ယောက်ကိုတိုက်ရိုက် နာမည်တပ်ပြီး ခေါ်ယူလို့မရပါ ။ အလုပ်ထောက်ပံ့ရေးဌာနက ပေးတဲ့ အလုပ်သမားစာရင်းကိုကြည့်ပြီး ခေါ်ယူရတာပါ ။ သူငယ်ချင်းက မတ်ဆက်ပေးလို့ ၊ ကြော်ငြာမှာတွေ့လို့ဆိုပြီး လုပ်လို့မရပါ ။
အလုပ်သမားများအနေဖြင့်လည်း ဘယ်သူဌေးဘယ်စက်ရုံမှာ လုပ်ချင်ပါတယ်ဆိုပြီး တိုက်ရိုက် လျှောက်ထားလို့မရပါ ။ ဘယ်လိုလုပ်ငန်းမျိုး ၊ ဘယ်ဒေသမှာ လုပ်ချင်ပါတယ် ဆိုတာမျိုးပဲေုပာခွင့်ရှိပြီး ၊ အလုပ်ထောက်ပံ့ရေးဌာနက ပေးတဲ့ အလုပ်ရှင်များစာရင်းထဲက စက်ရုံတွေမှာပဲ တရားဝင် လုပ်ခွင့်ရှိတာပါ ။ သူငယ်ချင်းစက်ရုံမှာ လူလိုနေလို့ပါဆိုပြီး လုပ်လို့မရပါ ။
ကိုရီးယားအစိုးရက မြန်မာတွေ ခေါ်ပါပြောလည်း မရပါ

သာဓက တစ်ခုပြောပါမယ် ။
လွန်ခဲ့သော ၂ လခန့်က ၊ မြန်မာမိတ်ဆွေ အီးနိုင်း တစ်ယောက်၊ ကိုရီးယားအသိ သူဌေးစက်ရုံမှာ လူလိုလို့ ၂ဦး၂ ဖက်က အလုပ်ရရှိရေး ၊ ခိုင်းစေခံရရေး ကြိုးစားပမ်းစားလုပ်ကြပါတယ် ။ တရားမဝင် အင်တာဗျူးပြီး လစာ အလုပ်ချိန် စသည်များ သဘောတူကြလို့ အလုပ်တောင်စဆင်းနေပါပြီ ။ အဆောင်တောင်ငှါးပေးထားပြီးပါပြီ ။ အလုပ်သမားကလည်း သည်မြို့နယ်မှာ အဲသလို အလုပ်မျိုးလုပ်လိုကြောင်း လျှောက်ပါတယ် ။ သူဌေးကလည်း သူ့ရုံမှာ မြန်မာအလုပ် သမား လိုချင်ကြောင်း ၊ ဘယ်လိုအရည်အချင်းတွေရှိဖို့လိုကြောင်း ၊ အလုပ်သမားနှင့် အံကိုက်အောင် သူများတွေ လျှောက်လို့မရ အောင် ၊ ဘောင်ကို ချုံ့ပြီး လျှောက်ကြပါတယ် ။ ဆိုင်ရာ အလုပ်ထောက်ပံ့ရေးဌာနမှာ အလုပ်ကြော်ငြာ နေ့တိုင်း သွားယူပေမယ့် ၊ အဲသည်စက်ရုံ စာရင်းပါမလာပါဘူး ။ ဘာဖြစ်လို့မပါတာလည်းလို့ တိုက်ရိုက်မေးလို့လည်း မရတဲ့ ကိစ္စပါ ။
မြန်မာမရှိဘူးဆိုပဲ

အလုပ်ရှင်ကိုကျတော့ သည်နယ်မှာ လျှောက်ထားတဲ့ မြန်မာမရှိဘူး ၊ ဘင်္ဂလားဒေ့ရှ် အလုပ်သမားပဲရှိတယ်လို့ ပြောပါတယ် ။ မြန်မာ ပြည်က အလုပ်သမားအသစ် ၂ယောက်ရဲ့ စာရင်းကိုသာ ပေးပါတယ် ။ (မြန်မာအသစ်တွေ ခေါ်အောင်လုပ်ပေးတဲ့သဘောပါ။) ရက်ကုန်ခါနီးသည့်တိုင် အလုပ်ရှင်နှင့် အလုပ်သားတွေ့အောင် ကြောငြာကို တွဲမပေးပါဘူး ။ အလုပ်သမားက စိတ်ပူလို့ အခြားရုံမှာ အလုပ်ဝင်လိုက်ရပါတယ် ။ အလုပ်ရှင်ကလည်း ခိုင်းလို့ ရတဲ့ အခြားအလုပ်သမား ခေါ်လိုက်ရပါတယ် ။
သည်တော့ အီးပီစနစ်မှာ ၊ ဘယ်နိုင်ငံသား ဘယ်နှယောက်ခေါ်မယ် ၊ ဘယ်နေ့အပြီးခေါ်မယ်လို့ အစိုးရက ဘောင်ခတ်ထားတာ မရှိကြောင်း သိရပါတယ်လို့ ဖြေကြားအပ်ပါတယ်ခင်ဗျာ ။
အလုပ်ခေါ်စာကျသူများစာရင်း

ကိုရီးယားအီးပီစနစ်သည် ကိုရီးယားအလုပ်အကိုင်နှင့် အလုပ်သမားဝန်ကြီးဌာနက ခွဲတမ်းချပေးပြီး ကိုရီးယားအလုပ်ရှင်တွေက အလုပ်သမား ခေါ်ယူနေတာမဟုတ်ပါ ။ ကိုရီးယားအစိုးရသည် ကိုရီးယားလုပ်ငန်းရှင်များက ခေါ်ယူတဲ့အလုပ်သမားစာရင်းများကို စုပြီး စာရွက်အပေးအယူလုပ်ငန်းကိုသာ လုပ်ပေးနေတဲ့ စနစ်ပါ ။ ကိုရီးယားမှာရှိတဲ့ ၁သန်း ၂သိန်းကျော်သော အီးပီလုပ်သားများစာရင်းကို လူသိရှင်ကြား တရားဝင် ထုတ်ပြန်ကြေညာထားတာ မတွေ့ဖူးသေးပါ။ ဒါကြောင့် အလုပ်ခေါ်စာကျသူများစာရင်း ဟန်းဂုရွာမှာတင်ပေးစေလိုပါတယ်ဆိုတဲ့ ညီငယ်တစ်ယောက်ရဲ့ မေတ္တာရပ်ခံချက်ကိုလည်း သည်ပို့စ်နှင့်ပဲ “ကျနော်များအဲသည်စာရင်းကို တင်ပေးနိုင်ရန် မစွမ်းပါကြောင်း” တစ်ပါတည်း ဖြေကြားပေးလိုက်ပါတယ်ခင်ဗျာ ။



လေးစားမှုဖြင့်-


ကိုဝိုင်း (မိုးညှင်း)
၂၀၁၂ ၊ ဖေ-၁၇ ။