မြန်မာစင်တာကော်မတီဖွဲ့စည်းရန် ဖိတ်ကြားခြင်း

ညီအစ်ကို မောင်နှမများ မင်္ဂလာပါခင်ဗျား~


ကိုရီးယားနိုင်ငံအတွင်း ကိုရီးယားရောက်မြန်မာများ၏ အကျိုးဖြစ်ထွန်းစေမည့်လုပ်ငန်းများကို ဆောင်ရွက်ခြင်းဖြင့် မြန်မာများ၏အခန်းကဏ္ဍမြင့်မားလာစေရန်နှင့် မြန်မာပြည်တွင်း ပရဟိတာ လူမှုရေးလုပ်ငန်း များအား ထောက်ပံ့ကူညီမှုများ လုပ်ဆောင်သွားရန်အတွက်ဟူသော ရည်ရွယ်ချက်ဖြင့်၊ မြန်မာစင်တာတစ်ခု ဖြစ်မြောက်လာစေရန် လွန်ခဲ့သော နိုင်ဝင်ဘာလမှပင် စတင်၍ပြင်ဆင် လုပ်ဆောင်ခဲ့ကြပါသည်။


ထိုအတွက်လည်း မအားလပ်သည့်ကြားမှပင် မိမိတို့တတ်နိုင်သည့်ဘက်မှ အချိန်ပေး ပါဝင် ဆွေးနွေးခဲ့ကြသည့် ညီအစ်ကိုမောင်နှများ၏ ၀ိုင်းဝန်းမှုကြောင့် စင်တာအဖြစ်ဖွင့်လှစ်မည့် အဆောက်အဦနှင့် ထိုအဆောက်အဦအား လိုအပ်သည်များ ပြန်လည်ပြုပြင်မွမ်းမံခြင်းနှင့် ဆောင်ရွက်ရန်ရှိသည်များကို ဆောင်ရွက်ရန်အတွက် ယာယီစင်တာကော်မတီကိုလည်း ဒုတိယအကြိမ် အစည်းအဝေးတွင် ဖွဲ့စည်းခဲ့ပါသည်။ ဒီဇင်ဘာလမှ စတင်အသုံးပြုနိုင်ပြီဖြစ်သော စင်တာတွင် နှစ်ကူးကာလ မိတ်ဆုံပွဲများနှင့်၊ လူမှုရေးလုပ် ငန်းအချို့၏ ဆွေးနွေးမှုများလည်း လာရောက်လုပ်ဆောင်နေကြပြီဖြစ်သည်။


ယခုအခါတွင် စင်တာအနေဖြင့် ရည်ရွယ်ထားသည့် ပန်းတိုင်ကို ရောက်ရှိနိုင်မည့် လုပ်ငန်းအစီအစဉ်များ ရေးဆွဲ ချမှတ်လုပ်ဆောင်ရန်လိုအပ်လာပါသဖြင့် စိတ်ပါဝင်စား တက်ကြွလုပ်ကိုင်လိုသည့် မြန်မာနိုင်ငံသား ညီအစ်ကိုမောင်နှများ စုံလင်စွာ ပါဝင်သည့် စင်တာကော်မတီကို ပီပြင်စွာ ဖွဲ့စည်းသွားရမည်ဟု ယူဆပါသည်။ သို့ပါ၍ မြန်မာစင်တာကော်မတီ ဖွဲ့စည်းနိုင်ရန် မိမိတို့တတ် နိုင်သည့် အကြံဥာဏ်၊ ဆွေးနွေးမှုများနှင့် ပူးပေါင်းပါဝင်လုပ်ဆောင်မှုများ ပြုလုပ်ပေးပါရန် စင်တာယာယီကော်မတီမှ လေးစားစွာ ဖိတ်ကြားအပ်ပါသည်။

စင်တာကော်မတီဖြစ်မြောက်ရေး အစည်းအဝေးကို အောက်ပါအတိုင်းပြုလုပ်မည်ဖြစ်ပါသည် -


၁။ စင်တာ ဖြစ်မြောက်လာရသည့် ဦးတည်ချက်နှင့် နောက်ခံအခြေအနေများကို ရှင်းလင်းတင်ပြခြင်း
၂။ လက်ရှိအချိန်အထိ စင်တာ၏ ရပ်တည်မှုနှင့် လုပ်ဆောင်ခဲ့သည်များကို ရှင်းလင်းတင်ပြခြင်း
၃။ ယာယီကော်မတီအား မိတ်ဆက်ပေးခြင်းနှင့် တက်ရောက်လာသူများထဲမှ သိလိုသည်များကို အပြန်အလှန် ဆွေးနွေးခြင်း၊
၎။ စင်တာကော်မတီ ရွေးချယ် တင်မြောက် ဖွဲ့စည်းခြင်း။
၅။ ဖွဲ့စည်းပြီးသော ကော်မတီမှ လုပ်ဆောင်ရန် ရည်ရွယ်ထားသည့် လုပ်ငန်းများအား မှတ်တမ်းတင်ခြင်း
၆။ လုပ်ငန်းများ စနစ်တကျအကောင်အထည်ဖော်ဆောင်နိုင်ရန်အတွက် ရည်ရွယ်ပြုလုပ်မည့် စင်တာကော်မတီ အလုပ်ရုံဆွေးနွေးပွဲကို အတည်ပြုသတ်မှတ်ခြင်း။
၇။ စင်တာဖွင့်ပွဲရက်သတ်မှတ်ခြင်း။
၈။ အစည်းအဝေးပြီးဆုံးခြင်း။


နေရာ။ ။ မြန်မာစင်တာ အဆောက်အဦ(Click Here)
အချိန်။ ။ နံနက် ၁၀နာရီ
နေ့ရက်။ ။ ဖေဖော်ဝါရီလ ၅ရက် တနင်္ဂနွေနေ့

အစည်းအဝေးတက်ရောက်မည့် ညီအစ်ကိုမောင်နှများအနေဖြင့် အစည်းအဝေးအချိန်မှီတက်ရောက်ပေးပါရန် လေးစားစွာ မေတ္တာရပ်ခံအပ်သည်။


မြန်မာစင်တာကော်မတီ(ယာယီ)
၂၀၁၂ခုနှစ် ဖေဖေါ်ဝါရီလ ၁ ရက်