မတရား အလုပ်ဖြုတ်ခံရသော ရွှေ့ပြောင်းအလုပ်သမားများအား လျော်ကြေးပေးစေရန် တရားရုံး ဆုံးဖြတ်ချက် ထွက်လာ

ကိုဝိုင်း(မိုးညှင်း)
ဆောအူးလ် ၊ ဇူလိုင် ၂၈ ။

၂၀၀၇ခုနှစ် ဆောင်းရာသီ ၊ ဖိုဟန်မြို့ရှိ ၊ စက်ရုံတစ်ရုံမှာ အလုပ်လုပ်နေတဲ့ ၊ မြန်မာနိုင်ငံသား မစ္စတာတီ ဟာ အလုပ်ခွင်မှာ ကိုရီးယားအလုပ်သမား တစ်ဦးနှင့် အချင်းများခဲ့ကြပါတယ် ။ အချင်းများခဲ့ကြရာမှ ဆဲဆိုကြတဲ့ အဆင့်ထိရောက်ရှိခဲ့ကြတယ်လို့ဆိုပါတယ် ။ အဲသည် အချင်းများမှုကို အကြောင်းပြုပြီး ၊ ကိုရီးယား အလုပ်ရှင်ဟာ မြန်မာအလုပ်သမားကို အလုပ်က ထုတ်ပြစ်လိုက်တယ်လို့ဆိုပါတယ် ။ အတူတူ အလုပ်လုပ်နေကြတဲ့ မြန်မာအလုပ်သမား ၆ယောက်တို့ စုပေါင်းပြီး ၊ အလုပ်မထုတ်ဖို့ အလုပ်ရှင်ကို ဝိုင်းဝန်း အရေးဆိုခဲ့ကြပေမယ့် အလုပ်ရှင်ဟာ အရေးဂရုမပြုဘဲ ဝိုင်းဝန်းအရေးဆိုခဲ့ကြတဲ့ မြန်မာအလုပ်သမားများပါ အလုပ်ထုတ်ခြင်း ခံခဲ့ကြရ တယ်လို့ဆိုပါတယ် ။ အလုပ်ရှင်ဟာ အလုပ်ပြောင်းရွှေ့ခွင့်ကိုပင် ခွင့်မပြုခဲ့ဘူးလို့ ဆိုပါတယ် ။ ဒီလိုနှင့် မြန်မာအလုပ်သမားများဟာ တရားမဝင်အလုပ်သမားများဘဝကို ရောက်ရှိသွားခဲ့ကြတယ်လို့ဆိုပါတယ် ။

မြန်မာ အလုပ်သမားများထံမှ အုပ်ချုပ်မှုစရိတ် လစဉ် ဖြတ်တောက်ယူနေခဲ့တဲ့ မြန်မာကုမ္ပဏီမှ တာဝန်ရှိသူများထံ ဆက်သွယ်အကြောင်းကြားခဲ့သော်လည်း မည်သည့် အကူအညီကိုမျှ မရခဲ့ကြဘူးလို့ဆိုပါတယ် ။ သူတို့ဟာ ကိုရီးယား အောက်ပိုင်း သင်္ဘောဆိပ်မြို့ ဖိုဟန်ကနေပြီး မြန်မာကုမ္ပဏီရုံးခန်း ရှိရာ ဆောအူးမြို့တော်အထိ အခက်အခဲများစွာနှင့် လာခဲ့ကြရတာလို့ ဆိုပါတယ် ။ သို့ပေမယ့် အုပ်ချုပ်မှုစရိတ်ဖြတ်တောက် ယူငင်နေတဲ့ ကုမ္ပဏီထံမှ မည်သည့် အကာအကွယ် အကူအညီကိုမျှမရရျိခဲ့သော်ငြား ကံကောင်းထောက်မစွာဖြင့် နိုင်ငံခြားသားအကူအညီပေးရေးဌာနတစ်ခုရဲ့ အကူအညီနှင့် ၊ လုပ်သက်ဆုကြေးငွေ နှင့် နောက်ဆက်တွဲလစာငွေများကို ရရှိခဲ့ကြပြီး ၊ အလုပ်ရုံပြောင်းရွှေ့ခွင့်ကိုပါ ရရှိခဲ့ကြတယ်လို့ဆိုပါတယ် ။

သို့ရာတွင် မြန်မာ အလုပ်သမားများဟာ အလားတူ ဖြစ်စဉ်မျိုးနောက်နောင်မပေါ်ပေါက်စေရေးအတွက် ၊ နောက်လာမည့် အလုပ်သမားများအတွက် အကာအကွယ်ဖြစ်စေရန်အလို့ငှာ ၊ မတရား အလုပ်ဖြုတ်ခံရခြင်းအတွက် လျော်ကြေးငွေပေးစေရန် တရားစွဲဆို တောင်းခံခဲ့ကြတယ်လို့ဆိုပါတယ် ။ ၁နှစ်ကျော်အကြာ ၊ လွန်ခဲ့တဲ့ မေလမှာတော့ အင်ချောန် ဒေသတရားရုံးတော်က ၊ မတရားအလုပ်ဖြုတ်ခံ ရတဲ့ မြန်မာအလုပ်သမားများကို လျော်ကြေးပေးစေရန် အမိန့်ချမှတ်လိုက်ကြောင်း သိရပါတယ် ။

ကိုရီးယားလူမှုအသိုက်အဝန်းမှာ နိုင်ငံခြားသားများနှင့် ဆိုင်တဲ့ ဥပဒေ ပြဌာန်းချက် အများအပြားရှိနေပါတယ် ၊ သို့ရာတွင် ဥပဒေအတိုင်း လိုက်နာဆောင်ရွက်သူအလွန်နည်းပါးနေသေးကြောင်းတွေ့ရတယ်လို့ဆိုပါတယ် ။ ယခုအမှုမှာ အလုပ်ရှင်အနေဖြင့် အဆင့်မြင့်တရားရုံးတော်သို့ အယူခံတက်ရောက်နေဆဲ ဖြစ်ကြောင်း သိရပါတယ် ။ ဘာပဲဖြစ်ဖြစ် ယခုအမှုမှာ မြန်မာ အလုပ်သမားတို့ အပြီးသတ်အနိုင်ရခဲ့မည်ဆိုလျင် ကိုရီးယားနိုင်ငံမှာ ရွှေ့ပြောင်းအလုပ်သမားတို့အတွက် အခြေခံရပိုင်ခွင့်တစ်ခု ပီပီပြင်ပြင် အကာအကွယ်ပေးနိုင်ပြီလို့ ဆိုရမှာဖြစ်တယ်လို့ ဥပဒေလောကသားများက ဝေဖန်နေကြကြောင်း သိရပါတယ် ။

ရည်ညွှန်းချက် ။
- အမ်ဒဗလျူတီဗီသတင်းစဉ်(၈၈)