လူတိုင်းသိထားသင့်သော သူတစ်ပါးထိခိုက်မှုအာမခံ

မြန်မာတစ်ဦးယာဉ်တိုက်ခံရခြင်း
မြန်မာရွှေ့ပြောင်းအလုပ်သမားတစ်ယောက် ၊ ကားတိုက်ခံရလို့ဆေးရုံတက်နေရကြောင်း ၊ ကားတစ်စီးက တိုက်ပြီးမောင်းပြေးသွားတာဖြစ်ကြောင်း ၊ ဘာကားအမျိုးအစား ၊ အရောင်အသွေး နှင့် ကားနံပါတ်စသည်တို့ကိုလည်း မှတ်မိသိရှိခြင်းမရှိကြောင်း ၊ ကားတိုက်ခံရလျင် ခံရခြင်း လမ်းမပေါ် လဲကျမူးမေ့သွားကြောင်း ၊ ကိုရီးယား တက္ကစီဆရာတစ်ဦးက တွေ့ရှိသဖြင့် ဆေးရုံသို့ တင်ပို့ပေးခဲ့ကြောင်း ၊ ဘယ်ဖက်မေးရိုး ၃ ပိုင်းကျိုးသွားပြီး ၊ မျက်နှာတစ်ခြမ်းစုတ်ပြတ်သွားကြောင်း ၊ မျက်နှာအရေပြား အစားထိုး ကုသဖို့ လိုအပ်မှာ ဖြစ်ကြောင်း ၊ ကားတိုက်ခံရသူမှာ ကိုရီးယားတွင် ဗီဇာရက်လွန်နေထိုင်သူဖြစ်ကြောင်း ၊ ကားတိုက်ခံရသည်ဟု ပြောလျင် ကိုရီးယားရဲနှင့် လူဝင်မှုကြီးကြပ်ရေးတို့ သိရှိသွားပြီး ဖမ်းဆီး ပြန်ပို့ခြင်း ခံရမည်ကို စိုးရိမ်နေသဖြင့် ကားတိုက်ခံရ သည်ဟု မပြောဘဲ ၊ အိမ်ပေါ်မှလိမ့်ကျသည်ဟု ဆေးရုံတွင် လိမ်လည် ပြောကြားထားကြောင်း ၊ ဆေးရုံစရိတ် ကြီးမားလှသော ကိုရီးယားတွင် ၄င်းအနေဖြင့် ဆေးဝါးကုသမှု ဆက်လက်ခံယူရန် အခက်အခဲရှိနေကြောင်း ၊ မြန်မာပြည်ပြန်ပြီး ဆေးဝါးကုသမှု ခံယူတော့မည်ဟု ပြောနေကြောင်း စသည်ဖြင့် ဆေးရုံတွင် သွားရောက် တွေ့ဆုံ ပြန်လာသော ၄င်း၏ မိတ်ဆွေတစ်ယောက်ထံမှ ပြောပြသိရှိရပါသည် ။

ယာဉ်တိုက်ခံရလျင် ၊ ဘာလုပ်သင့်သနည်း
၎င်းဖြစ်စဉ်နှင့်ပတ်သက်၍ ကျနော်တို့ စကားစမြည်ပြောဖြစ်ကြပါသည် ။ သည်လိုနှင့် သူတစ်ပါးထိခိုက်မှု အာမခံအကြောင်းကို လည်း ဆွေးနွေးဖြစ်ကြပါသည် ။ ကားတိုက်ခံရသူမှာ ကိုရီးယားတွင် ရက်လွန် နေထိုင်သူဖြစ်ပြီး ၊ ဘာအာမခံမှလည်း မထား ၊ ထားလို့လည်းမရသည့်အနေအထားဖြစ်သဖြင့် ၊ သူတစ်ပါးလည်းမလုပ်မရှုပ်ရ ၊ အိမ်ပေါ်က လိမ့်ကျသည်ဟုပြောလိုက်ခြင်းက မှန်ကန်သင့်တော်သောလုပ်ရပ်ဟု ထင်မြင်ကြောင်း မှတ်ချက်ပေးပါသည် ။ စာရှုသူကကော မည်သို့ယူဆပါသနည်း ။ မိတ်ဆွေရဲ့ အရင်းခံအသိပေါ်မှာမူတည်၍ အဖြေပေးလိမ့်မည်ထင်ပါသည် ။
ကိုယ်တိုင်ထားဖို့မလိုသော အာမခံကြေးတစ်မျိုး
သူတစ်ပါးထိခိုက်မှုအာမခံဆိုသည်မှာ ၊ မိမိကိုယ်တိုင်က သီးသန့်ထားစရာမလိုသော အာမခံအမျိုးအစားဖြစ်ပါသည် ။ သူတစ်ပါးကို အန္တရာယ်ဖြစ်စေနိုင်သော စက်တပ်ယာဉ်များ ပိုင်ဆိုင် သို့မဟုတ်သုံးစွဲသူများက ၊ ပိုင်ဆိုင်မှု ရှိလာသည်နှင့်တစ်ပြိုင်နက် မထားမနေထားရသော အာမခံအမျိုးအစားဖြစ်ပါသည် ။ ထားရအောင်လည်း သက်ဆိုင်ရာအစိုးရအသီးသီးက စီမံဆောင်ရွက်ထားလေ့ရှိကြပါသည် ။ မော်တော်ကားပိုင်ရှင်များ ကားဝယ်ပြီ ဆိုကတည်းက ၊ အဆိုပါ အာမခံကို ထားရှိရပါသည် ။ အာမခံမထားလျင် မော်တော်ကားလိုင်စင် ထုတ်ပေးလေ့မရှိပါ ။ အဆိုပါကားကိုလည်း အများပြည်သူနှင့် သက်ဆိုင်သည့်နေရာများမှာ မောင်းနှင် သုံးစွဲခွင့်မရှိပါ ။ ထိုသို့ အာမခံအသီးသီးထားရှိရသော စက်တပ်ယာဉ်များအနေဖြင့် သူတစ်ပါးကို ထိခိုက်စေမှုရှိခဲ့ပါက ၊ အာမခံငွေကို ရယူထားသည့် အာမခံဌာန သို့မဟုတ် ကုမ္ပဏီအနေဖြင့် ၊ ထိုခိုက်မှုဖြစ်စေခဲ့သည့် စက်တပ်ယာဉ်ကိုယ်စား ၊ ထိခိုက်ခံရသူတို့ အာမခံကြေးကို ပေးလျော်ပါသည် ။ ထိုခိုက်ခံရမှုအခြေအနေကိုလိုက်၍ ဒဏ်ရာရရှိမှု ပြင်းထန်လျင်ပြင်းထန်သလို ၊ သေလျင်လည်းသေဆုံးသည့်အလျောက် သတ်မှတ်ထားသည့် အချိုးအဆအတိုင်း ပေးလျော်ခြင်းဖြစ်ပါသည် ။ ယာဉ်တိုက်မှုဖြစ်စေခဲ့သည့် ယာဉ်မောင်းက သို့မဟုတ် ယာဉ်ပိုင်ရှင်က တိုက်ရိုက် ပေးလျော်ရခြင်းမျိုးမဟုတ်ပါ ။
တရားခံမိဖို့အဓိကမဟုတ်
ယာဉ်တိုက်မှုခံရလျင် ၊ ဖြစ်စဉ်ကို အနီးဆုံးရဲစခန်း သို့မဟုတ် မိမိရောက်ရှိသည့် ဆေးရုံသို့ ဖွင့်ပြောဖို့ လိုအပ်ပါမည် ။ သို့မှသာ ဆေးရုံမှုခင်းဌာန သို့မဟုတ် သက်ဆိုင်ရာရဲများက ယာဉ်တိုက်မှု မှန်မမှန် လိုအပ်သလို စုံစမ်း စစ်ဆေးမှုများ ပြုလုပ်ပြီး ဖြစ်စဉ်ကို သက်ဆိုင်ရာမှတ်တမ်းများတွင်ရေးသွင်းခြင်း ၊ သက်ဆိုင်ရာသို့အစီရင်ခံခြင်းများ ပြုလုပ်နိုင်မည် ဖြစ်ပါသည် ။ ကိုရီးယားလမ်းများတွင် အလိုအလျောက် ရုပ်သံမှတ်တမ်းရိုက်ကူးစက် (စီစီတီဗီ) များဖြင့် မှတ်တမ်းတင်ထားလေ့ရှိပြီး ၊ ထိုမှတ်တမ်းခွေများမှာလည်း လပေါင်းများစွာ ပြန်လည်စစ်ဆေးကြည့်ရှုနိုင်ကြောင်း သိရပါသည် ။
ယာဉ်တိုင်မှုဖြစ်သည့် အချိန်နှင့် နေရာကို တိတိကျကျပြောနိုင်ခဲ့မည်ဆိုလျင် ၊ ယာဉ်တိုက်ပြေးတရားခံ (ပင်းဆိုနီ) ကို အလွယ်တကူ ဖော်ထုတ်ဖမ်းဆီးရမိနိုင်သည့်အခြေအနေတွင် ရှိကြောင်းလည်း သိရပါသည် ။ ယာဉ်တိုက်သည့် တရားခံကို မဖမ်းမိသည့်တိုင် မိမိသည် အမှန်တကယ်ယာဉ်တိုင်ခံရကြောင်း သက်သေပြနိုင်ဖို့သာ အဓိကဖြစ်ပါသည် ။ ယာဉ်တိုက်မှုကျူးလွန်သူတရားခံဖမ်းမိရေးမှာ ရဲများ၏ တာဝန်ဖြစ်ပါသည် ။
ယာဉ်တိုက်ခံရလျင် ၊ အာမခံကြေးရပိုင်ခွင့်ရှိ
အထက်ပါဖြစ်စဉ်တွင် ၊ ယာဉ်တိုက်ခံရသူ မိတ်ဆွေက ပါးတွင် ဒါဏ်ရများရရှိခဲ့ခြင်းသည် ယာဉ်တိုက်ခံရကြောင်း သက်သေ အထောက်အထားတစ်ခုဖြစ်ပြီး ၊ တက္ကစီဆရာက မိမိလမ်းမပေါ်တွင် မူးလဲနေကြောင်း တွေ့ရှိခြင်းသည်လည်း မိမိ ယာဉ်တိုက် ခံရကြောင်း သက်သေ အထောက်အထား တစ်ခုပင် ဖြစ်မည်ဟု သဘောရပါသည် ။ အကယ်၍ အထက်ပါ ဖြစ်စဉ်တွင် ယာဉ်တိုက်ခံရသူက ၊ မိမိ ယာဉ်တိုက် ခံရကြောင်း ဆေးရုံသို့ သတင်းပို့ခဲ့မည်ဆိုလျင် ၊ ဆေးရုံမှုခင်းဌာနက ယာဉ်တိုက်မှုဖြစ်စဉ် အမှုတွဲဖွင့်ထားပြီး ၊ သက်ဆိုင်ရဲများက ယာဉ်တိုက်မှုဖြစ်ပွးရာ နေရာသို့သွား ရောက်၍ မြေပုံများရေးဆွဲခြင်း ၊ ပတ်ဝန်းကျင်မှ သက်သေများကို မေးမြန်းခြင်း စသည်ဖြင့် လိုအပ်သည့် စုံစမ်း စစ်ဆေးမှုများပြုလုပ်ကာ ၊ ယာဉ်တိုက်မှု အဖြစ်မှတ်တမ်း တင်ထားခဲ့မည်ဆိုလျင် ၊ အာမခံကော်ပိုရေးရှင်းထံတွင် ယာဉ်တိုက်ခံရမှု အာမခံကြေးလျှောက်ထားရယူနိုင်သော အနေအထားဖြစ်သည်ဟု လေ့လာသိရှိရပါကြောင်း ။
လေးစားမှုဖြင့်-
ကိုဝိုင်း(မိုးညှင်း)