နွဲကြတူပျော် ၊ အာဆီယံပွဲတော် (Bravo ! ASEAN in Korea) ကျင်းပမည်

ကိုဝိုင်း(မိုးညှင်း)
ဒီဇင်္ဘာ ၂ ၊ ဆောအူးလ် ။
အာဆီယံ(ကိုရီးယား)ဆင်တာက ကြီးမှုးလျက် ၊ ကိုရီးယားနိုင်ငံတွင်းရှိ အာဆီယံနိုင်ငံသားများ အဆို အတီး အက ယဉ်ကျေးမှု (ပြိုင်ပွဲ) ပွဲတော်ကို ဒီဇင်္ဘာလ၂၀ ရက်နေ့တွင် ၊ ကျင်းပသွားမည်ဖြစ်ကြောင်းသိရသည် ။
စိတ်ပါဝင်စားသူများသည် အောက်ဖော်ပြပါ စာရွက်စာတမ်းများနှင့်အတူ ပြိုင်ပွဲကျင်းပရေးကော်မတီ (1467-80, Arirang Tower, 12th Floor, Bravo ! ASEAN in Korea Office, Seocho Dong, Seocho Gu, Seoul) ထံ ဒီဇင်္ဘာလ ၄ ရက်(သောကြာနေ့) နောက်ဆုံးထား၍ ၊ လျှောက်ထားကြရမည်ဖြစ်ကြောင်း ကြေညာထားသည်-
၁ ။ လျှောက်လွှာပုံစံ ။
၂ ။ နိုင်ငံကူးလက်မှတ် မိတ္တူ(များ) ။
၃ ။ ပြိုင်ပွဲဝင်မည့် တေး ၊ အတီး ၊ အက နမူနာ ( ဓါတ်ပုံ ၊ တိပ် ၊ စီဒီ စသည် ။)

ပြိုင်ပွဲဝင်သူ(များ)သည် ကိုရီးယားနိုင်ငံရောက် အာဆီယံနိုင်ငံသားဖြစ်ရမည့်အပြင် ၊ ပြိုင်ပွဲဝင်မည့် သီချင်း ၊ အတီး ၊ အက အကြောင်းအရာသည် နိုင်ငံရေး ၊ ဘာသာရေးတို့နှင့် ကင်းလွတ်မှု ရှိစေရမည် ဖြစ်ကြောင်း ၊ မည်သူမဆို ကြည့်ရှုနိုင်သည့် ဝတ်စားဆင်ယင်မှုမျိုး ဖြစ်စေရမည်ဖြစ်ကြောင်း ၊ ပြိုင်ပွဲကျင်းရေးကော်မတီက သတ်မှတ်ထားသည့် အချိန်ဇယားအတိုင်း ပါဝင်ယှဉ်ပြိုင်ရမည် ဖြစ်ကြောင်း နှင့် ပြိုင်ပွဲတွင် မိမိတို့ နှစ်သက်ရာ ကိုရီးယား သို့မဟုတ် အာဆီယံနိုင်ငံများမှ ရိုးရာ သို့မဟုတ် ခေတ်ကြိုက် တေး ၊ ဂီတ ၊ အက တို့ဖြင့် ပါဝင်ယှဉ်ပြိုင်နိုင်ကြကြောင်းသိရသည် ။
ကိုရီးယားနိုင်ငံတွင်းရှိ ၊ အာဆီယံနိုင်ငံသားများက အဖွဲ့လိုက် သို့မဟုတ် တစ်ဦးချင်းအလိုက် ပါဝင် ယှဉ်ပြိုင်နိုင်ကြကြောင်း ၊ ကော်မတီအနေဖြင့်မူ အဖွဲ့ သို့မဟုတ် ပုဂ္ဂိုလ် ၃၀ကျော်တို့ ပါဝင်ယှဉ်ပြိုင်ကြလိမ့်မည်ဟု မျှော်လင့်ထားကြောင်း ၊ ဒီဇင်္ဘာ ၆ ရက်နေ့တွင် ပဏာမ ယှဉ်ပြိုင်စေပြီး ၊ ၄င်းတို့အနက် ဆန်ကာတင်ကျန်ရစ်မည့် အဖွဲ့ သို့မဟုတ် ပုဂ္ဂိုလ် ၁၀ ဖွဲ့/ဦး တို့က ၂၀ ရက်နေ့ MELON-AX (Gwang jin-gu, Seoul) တွင် အပြီးသတ် ပြိုင်ပွဲဝင်ကြရမည်ဖြစ်ကြောင်း သိရသည် ။
ချီးမြှင့်မည့် ဆုများမှာ ၊
အကောင်းဆုံးဆု(Grand Prize) ဝမ် ၂၀ သိန်း ။
ရွှေတံဆိပ်ဆု(Gold Prize) ဝမ် ၁၀ သိန်း ။
ငွေတံဆိပ်ဆု(Silver Prize)ဝမ် ၉ သိန်း။
ကြေးတံဆိပ်ဆု(Bronze Prize) ဝမ် ၆သိန်း ။
နှစ်သိမ့်ဆု(Encouragement Award) ဝမ် ၅သိန်း။
လူကြိုက်အများဆုံးဆု(Popularity Award) ဝမ် ၄သိန်း။
ပါဝင်ယှဥိပြိုင်မှုဆု(Participation Award) ဝမ် ၃သိန်း ဖြစ်ကြောင်းသိရသည် ။
အသေးစိတ်အချက်အလက်များကို PD Nam Koong Jung, 02-3475-5016,02-3475-5249, (HP-010-2733-3333) ထံမေးမြန်းနိုင်သည်ဟုဆိုပါသည် ။
ယခုပြိုင်ပွဲကို ၊ အာဆီယံနိုင်ငံသားများနှင့် ကိုရီးယားနိုင်ငံသားတို့ ယဉ်ကျေးမှုဖလှယ်ရေး မြှင့်တင်မှု အစီအစဉ်အဖြစ် ကျင်းပခြင်းဖြစ်ကြောင်း ၊ ပြိုင်ပွဲဝင် အဆိုအတီးအက များကို အာရိရန်တီဗီ(Arirang TV) မှတစ်ဆင့် တစ်ကမ္ဘာလုံးသို့ လွှင့်ထုတ်ပြသသွားမှာဖြစ်ကြောင်း၊ ကိုရီးယားအာဆီယံဆင်တာ(ASEAN-Korea Center) သည် ကိုရီးယားနိုင်ငံနှင့် အာဆီယံနိုင်ငံများ ယဉ်ကျေးမှုဖလှယ်ရန် ၊ ခရီးသွားလုပ်ငန်းမြှင့်တင်ရန် ၊ ကုန်သွယ်မှုတိုးမြှင့်ရန်နှင့် ၊ ရင်းနှီးမြှပ်နှံမှုတိုးမြှင့်စေရန် ရည်ရွယ်လျက် ၊ ၂၀၀၇ နိုဝင်္ဘာတွင် ကျင်းပခဲ့သည့် ၁၁ကြိမ်မြောက် အာဆီယံထိပ်သီးဆွေးနွေးပွဲတွင် အာဆီယံနိုင်ငံခြားရေးဝန်ကြီးများနှင့် ကိုရီးယားအစိုးရတို့က နားလွန်မှုစာချွန်လွှာ(MOU)ရေးထိုးချုပ်ဆို ဖွှဲ့စည်းပေါ်ပေါက်လာခြင်းဖြစ်သည်ဟုဆိုပါသည် ။

Ref;
- Pamphlet of Bravo ! ASEAN in Korea.