နိုင်ငံတော် အလံ

ရေးသားသူ — ခင်အောင်အေး


ညီလေးတို့

အကို ကိုးရီးယားနိုင်ငံကို ၂ ခေါက်ရောက်တယ်။ ၂ ခေါက်စလုံးဟာ အခု ညီလေးတို့ ဒီနေ့ ဒီအခါ ဒီနေရာမှာ စုရုံးရောက်ရှိနေခဲ့တဲ့ ရွှေ့ပြောင်းအလုပ်သမား လို့ နိုင်ငံတကာက သိမှတ်ခေါ်ဝေါ် သုံးစွဲခံရတဲ့ ကိုယ့်ညီလေး တွေကို အကြောင်းပြုပြီးရောက်ရတာချည့်ပါပဲ

အကယ်၍သာ အကိုဟာ ပြီးခဲ့တဲ့ ဒီဇင်ဘာ ၇ ရက်နေ့က အကို့ကို ဖိတ်ခေါ်တဲ့ ကိုးရီးယားအဖွဲ့ရဲ့
နားလည်မှုနဲ့ သဘောထားကြီးမှုကို ရခဲ့မယ်ဆိုရင် ညီလေးတို့တွေနဲ့အတူ အခုပွဲကို အတူတူ ဆင်နွှဲနိုင်ခွင့် ရနေမှာပါပဲ အဲဒီအတွက် မချိတင်ကဲ ဖြစ်ရပါတယ်

ခုလို ကိုယ့်ညီလေးတွေ အသိစိတ်ဓါတ်ရှိရှိ ညီညီညွတ်ညွတ်နဲ့ ရသင့်ရထိုက်တဲ့ တရားမျှတပြီး ဥပဒေနဲ့ညီညွတ် တဲ့ တောင်းဆိုချက်တွေ တောင်းဆိုနေတဲ့ အချိန်မှာ အကို မရှိနိုင်ပေမယ့် အကို့ကိုယ်စား ကဗျာလေးတပုဒ်ကို
တက်ရောက်ခွင့်ပြုပါ

အဲဒီကဗျာလေးကတော့…

နိုင်ငံတော် အလံ

တီဗွီ အစီအစဉ် ၂ ခုစလုံးမှာ
ရှေးခေတ်သမိုင်းနောက်ခံ ဇာတ်လမ်း
“ခွေးမသား ဖမ(ဗမာ) သေပေတော့”
“ကျူးကျော်သူ ဖမ(ဗမာ)တွေကို မောင်းထုတ်ကြဟေ”့
“ဖမ(ဗမာ)ဖက်ကို သူလျှို လုပ်တဲ့ သစ္စာဖောက်လောက်ကောင် ငရဲကိုသွားတော့”

အိုက်လို့ဟ ထားတဲ့ အခန်းတံခါးကို အသာစေ့လိုက်တယ်
တီဗွီကို မသိမသာ အသံတိုးလိုက်တယ်
ယောင်တီး ယောင်န နဲ့ ကိုယ်ပေါ်က အဝတ်အစားတွေ အကုန်လုံးချွတ်ချလိုက်တယ်
ပြီးတော့ ရေချိုးခန်းထဲ ကယောင်ကတမ်း ဝင်လိုက်တယ်

တီဗွီမှာ သတင်းအစီအစဉ် ပြောင်းသွားပြီ
ဟုတ်တယ် ထိုင်းနိုင်ငံတဝှမ်းလုံး မြစ်ကြောင်းတလျှောက် မြို့ရွာတွေ
ရေမြုပ်နေတဲ့သတင်း

ရေချိုးခန်းတံခါးကို ပိတ်မယ်အလုပ်
ဖမ(ဗမာ) ဆိုတဲ့ အသံကြားလို့ ခေါင်းပြူကြည့်လိုက်တော့
ပရာထေ့ ဖမ(ဗမာ နိုင်ငံ) မှာ အလံ အသစ် ပြောင်းသွားတဲ့သတင်း

ဘယ်လောက်ကြာအောင် ကိုယ့်ကိုယ်ကို ရေတွေနဲ့လောင်းချနေမိမှန်း မသိတော့…

ခင်အောင်အေး
၂၂၊ အောက်တိုဘာ။ ၂၀၁၀


အမြန်ဆုံး အမေ့အိမ်ကို ပြန်ပြီး အမေ့ရင်ခွင်မှာ ဝမ်းနည်းဝမ်းသာ (အကျည့်တန် အရုပ်ဆိုးခဲ့တဲ့ နှစ်ပေါင်းများစွာ အတွက်) ရှိုက်ကြီးတငင် ငိုချခွင့်ရတဲ့ သား/သမီးများ ဖြစ်ကြပါစေ…

ခင်အောင်အေး
၁၄၊ ဒီဇင်ဘာ၊ ၂၀၁၀