Friday, February 7, 2014

မြန်မာအလုပ်သမားသမဂ္ဂ လိုအပ်နေပြီလား

ရေးသားသူ — စိုးမိုးသူ
အုတ်တချပ်စီကို ဆင့်ပြီး တင်ထားရုံနဲ့ တိုက်မဖြစ်နိုင် တိုက်အုတ်များကို တခုနှင့်တခု အင်္ဂတေဖြင့် ဆက်စပ်ရသေးသည်။
ထို့အတူလူတယောက်စီ တယောက်စီ စုနေကာမျှဖြင့် လောကကြီး မဖြစ်နိုင်
ထိုလူတို့သည် တဦးနှင့်တဦး အဆက်အသွယ်ရှိပါမှ လူ့လောကကြီးဖြစ်လာသည်။
အုတ်တိုက်ကြီး၇ဲ့ ခိုင်ခန့်မှုက အင်္ဂတေအပေါ်တွင်တည်ရှိသကဲ့သို့
လူ့လောကကြီးရဲ့ ခိုင်မြဲတည်တန့်မှုမှာ လူတဦးနှင့်တဦး ဘယ်ပုံဘယ်နည်း
ဆက်သွယ်သည်ဟူသောအချက်တွင် တည်ရှိလျှက် ရှိနေပေသည်။
(မောင်သိန်းဖေ -ဟစ်တလာနှင့် ချိန်ဘာလိန် ဘယ်သူမှားသလဲ)


ဒီနေ့
ကိုရီးယားရောက် မြန်မာအလုပ်သမား အများစု တွေ့ကြုံနေကြရတဲ့ လုပ်ငန်းခွင် ဆိုင်ရာ၊ ကျန်းမာရေး ဆိုင်ရာနှင့် အခြား အထွေထွေ အခက်အခဲများကို ရေရှည် ထိထိရောက်ရောက် ၀ိုင်းဝန်းဖြေရှင်းနိုင်မည့် နည်းလမ်းတွေကို ဆွေးနွေးလိုလို့မြန်မာအများစု အဖွဲ့ဝင်ထားတဲ့ ဖေ့စ်ဘွတ်ဂရုတွေမှာ ပို့စ်တင်ခဲ့ပါတယ်။

ဒီအပေါ်မှာ အားလုံးက စိတ်ပါဝင်စား ၀ိုင်းဝန်း အကြံပေးကြတာကို ကြည့်ရှုခြင်းအားဖြင့်
ဒီ ကိစ္စဟာ မိမိ၊ သူတပါးအတွက် အထူး လိုအပ်နေတဲ့ အရာဖြစ်ကြောင်းလည်း သုံးသပ်မိပါတယ်။
အကြံကောင်းဥာဏ်ကောင်းတွေကို တတ်စွမ်းသမျှ ပေးကြတဲ့အတွက်လည်း
ကျေနပ်စရာ နည်းလမ်းတွေကိုလည်းရရှိခဲ့ပါတယ်။



မြန်မာအလုပ်သမားသမဂ္ဂလိုအပ်နေပါပြီ

မြန်မာအလုပ်သမားတွေ တွေ့ကြုံနေကြရတဲ့ ပြသနာတွေကို ဖြေရှင်းနိုင်ဖို့ရာမြန်မာအလုပ်သမားသမဂ္ဂလိုအပ်နေတယ်လို့ ယူဆထားခဲ့တာမို့ လွန်ခဲ့တဲ့ လတွေကလည်း ဆန္ဒသဘောထားတွေကို တီးခေါက်ကြည့်ဖူးသလို အများစုက လိုလားနေကြတာကိုလည်း သိခဲ့ရပါတယ်။
ဥပဒေလမ်းကြောင်းအောက်မှာ တရားဝင် မြန်မာအလုပ်သမား သမဂ္ဂဖွဲ့နိုင်ဖို့ ကျွမ်းကျင်သူများနဲ့လည်း
 ဆွေးနွေးထားခဲ့ပြီးပါပြီ။

ဒီနေ့ အများစုက ၀ိုင်းဝန်းအကြံပေးကြတာကလည်း
ပင်မအဖွဲ့အစည်း တခုဖွဲ့ကာ လက်အောက်ခံ ဒေသအလိုက် အဖွဲ့အစည်းခွဲတွေဖွဲ့၊
ဦးဆောင်သူ အသီးသီး ထားရှိ၊ အဖွဲ့ဝင်စုဆောင်း၊ အဖွဲ့ဝင်ကြေးထည့်ဝင်စေပြီး ရန်ပုံငွေစုဆောင်း၊
ဒေသအလိုက် အချိန်ပြည့်ဝန်ထမ်းတွေကို လစာနဲ့ခန့်အပ်ပြီး မြန်မာအလုပ်သမားတွေ အရေးကို
 ကူညီဖြေရှင်းပေးဖို့ ဖြစ်ကြပါတယ်။


လက်ရှိ တည်ရှိ မြန်မာအဖွဲ့အစည်းများ ပူးပေါင်းမှု လိုအပ်

လက်ရှိ ကိုရီးယားမှာ  မြန်မာအဖွဲ့အစည်းတွေ အများကြီး ရှိထားကြပြီးပြီ ဖြစ်သလို တတ်နိုင်သလောက် အခက်အခဲတွေကိုလည်း ၀ိုင်းဝန်းဖြေရှင်းပေးနေကြပါတယ်။ ဒါပေမယ့် သူတို့အားလုံးကလည်း အသက်မွေးဝမ်းကျောင်း အလုပ်တွေ ကိုယ်စီရှိလို့ အမြဲတမ်း အသင့်ပြင် အချိန်ပြည့် မကူညီနိုင်ပါ။ သူတို့တွေ အမြဲ အားမလို အားမရ ဖြစ်ကြရတာကလည်း ဘ၀နဲ့ ဆန္ဒ ထပ်တူမကျမှုပါပဲ။
 ပရဟိတကို ဇောက်ချလုပ်ဖို့ကလည်း ၀မ်းမလုံခြုံ၊ ၀မ်းလုံခြုံအောင်လုပ်ရပြန်တော့လည်း စိတ်တိုင်းကျ ပရဟိတကို မလုပ်နိုင်။ 
ဒီလိုနဲ့ပဲ မြန်မာတွေအနေနဲ့ မိမိတို့ရဲ့ အခက်အခဲကို မနေနိုင်လို့ နိုင်သလောက် နှုတ်၏ဆောင်မခြင်း လက်၏ဆောင်မခြင်းနဲ့ ကူညီသူတွေနဲ့ပဲ တင်းတိမ်နေကြရပါတယ်။ ပြသနာဆိုတာကလည်း
တကြိမ်တည်းနဲ့ ပြီးသွားတာမဟုတ်တာမို့ အချိန်ပြည့် ကိုယ်ဖိမကွာ လိုသလို လိုက်လံဖြေရှင်းပေးရ တာဖြစ်တော့ လက်တွေ့မှာ ကယ်သူမဲ့တာမို့ အားကိုးရာမဲ့  မြန်မာအလုပ်သမားတွေမှာလည်း မျက်စိကလယ် ဖြစ်နေကြရတာဟာ ယနေ့ လက်ရှိ အခြေအနေတွေပါပဲ။

ဒီတော့ တရိပ်ရိပ် တိုးပွားလာတဲ့ မြန်မာအလုပ်သမားအရေအတွက်နဲ့အမျှ
တဖွားဖွား ဖြစ်ပေါ်နေတဲ့  အလုပ်သမားပြသနာတွေကို 
ထိထိေ၇ာက်ေ၇ာက် ကူညီဖြေရှင်းနိုင်မယ့် မြန်မာအလုပ်သမားသမဂ္ဂတခု ပေါ်ပေါက်နိုင်ဖို့  
တည်ရှိပြီးတဲ့လက်ရှိ မြန်မာအဖွဲ့အစည်းတွေက ဦးဆောင်ပြီး တက်ကြွသူ တသီးပုဂ္ဂလများနဲ့အတူ 
မိမိတို့ အတွေ့အကြုံ အကြံဥာဏ်တွေကို ဝေငှပြီး ကူညီပေးဖို့ လိုအပ်ပါတယ်။


မြန်မာအလုပ်သမားသမဂ္ဂ အင်အားကြီးထွား၇န် အစီအမံ

ကိုရီးယားမှာ ကြုံကြရတဲ့ ပြသနာအများစုကလည်း အလုပ်သမားပြသနာတွေ ဖြစ်ကြတာမို့ အလုပ်သမားသမဂ္ဂကို တည်ထောင်ခြင်းဟာ အသင့်တော်ဆုံးလို့ဖြစ်သလို ကိုရီးယားရောက် ရွှေ့ပြောင်းသူရဲ့ ၇၀%ကလည်း ရွှေ့ပြောင်းအလုပ်သမားတွေပဲဖြစ်ကြပါတယ်။
တရားဝင် မြန်မာအလုပ်သမားသမဂ္ဂတခုဖြစ်ပေါ်ပြီးနောက် ကိုရီးယားဒီမိုကရစ်တစ်အလုပ်သမားသမဂ္ဂပေါင်းချုပ်ကြီးရဲ့ အဖွဲ့ဝင် သမဂ္ဂအဖြစ် ပူးပေါင်းလိုက်ရင် မြန်မာအလုပ်သမားသမဂ္ဂရဲ့ အင်အားမှာ ကိုရီးယားအလုပ်သမားသမဂ္ဂ၀င်များရဲ့ အင်အားကိုပါ ထပ်ပေါင်းထည့်လိုက်တာမို့ အင်အား ပိုမိုကြီးထွားလာနိုင်ပါတယ်။ အလုပ်သမားအခွင့်အရေးချိုးဖောက်ခံရတဲ့အခါ မိမိတို့ မြန်မာအချင်းချင်းအင်အားဖြင့်သာမက ကိုရီးယားအလုပ်သမားသမဂ္ဂပေါင်းချုပ်ရဲ့ အင်အားနှင့်အတူ တိုက်ပွဲဝင်နိုင်မှာ ဖြစ်ပါတယ်။ ထို့ပြင် ဒေသတွင်း ရွှေ့ပြောင်းအလုပ်သမား ကွန်မြူနတီများ၊ နိုင်ငံခြားသားအလုပ်သမား စင်တာများနှင့် လူ့အခွင့်အရေးဆိုင်ရာ အဖွဲ့အစည်းများ၇ဲ့ အင်အားကိုလည်း အတူ ရယူကာ အင်အားကြီးမားတဲ့ မြန်မာအလုပ်သမားသမဂ္ဂ အဖြစ် ရပ်တည်နိုင်မှာဖြစ်ပါတယ်။


သမဂ္ဂ၀င်များကို ထိရောက်စွာ ကူညီရေးအစီအမံ

သမဂ္ဂ၀င်တွေကို လိုအပ်တဲ့ အချိန်မှာ အချိန်ပြည့် အကူညီပေးနိုင်ဖို့ ရုံးခန်းဖွင့်ကာ အမြဲတမ်း ၀န်ထမ်းတွေကို လစာပေးခန့်ထား၇ပါမယ်။ ၀န်ထမ်းတွေအပြင် ရုံးအဖွဲ့မှူး၊ ဘဏ္ဍာရေးမှူးကိုလည်း လစာပေးခန့်ထားရပါမယ်။
လစာနဲ့ ရုံးအတွက် လိုအပ်တဲ့ ရန်ပုံငွေကို သမဂ္ဂ၀င်တွေရဲ့ လစဉ်ကြေးတွေနဲ့ စီမံရမှာဖြစ်ပါတယ်။ အကူအညီတောင်းဆိုမယ့်သူကလည်း အရင်ဦးဆုံး သမဂ္ဂ အဖွဲ့ဝင် ၀င်ရပါမယ်။ဒါမှလည်း အဖွဲ့ဝင်တယောက်အနေနဲ့ တည်တည်တန့်တန့်ဖြင့်  မိမိလိုရာကို မိခင်အဖွဲ့အစည်းထံမှ အများနဲ့ တန်းတူညီမျှ တောင်းခံနိုင်မှာဖြစ်ပါတယ်။
ရန်ပုံငွေ တောင့်တင်းနိုင်ဖို့ သမဂ္ဂအဖွဲ့ဝင်များများ ပါဝင်ဖို့ လိုပါတယ်။

ဝန်ထမ်းတယောက်ကို ခန့်အပ်ဖို့ဆိုတာကလည်း
၁) ဒီလိုအလုပ်မျိုး လုပ်ခွင့်ရတဲ့ ဗီစာနဲ့ နေထိုင်သူ
၂) ကိုရီးယားဘာသာစကားကို အထူး ကျွမ်းကျင်သူ
၃) အလုပ်သမားဥပဒေနှင့် ကိုရီးယားနယ်မြေကို အတော်အတန်ကျွမ်းကျင်သူ
၎) ပြသနာဖြေရှင်းတတ်သည့် အတွေ့အကြုံရှိသူ
ဖြစ်ရပါမယ်။ လက်ရှိမှာ အထက်ပါ အရည်အချင်းနဲ့ ပြည့်စုံသူက အတော်ရှားပါတယ်။ လက်ရှိ အဖွဲ့အစည်းတွေထဲမှာ ထမ်းဆောင်နေသူတွေကို ၀န်ထမ်းအဖြစ် ပါဝင်ဖို့ ကမ်းလှမ်းရပါမယ်။
ဒါကြောင့် လုပ်ပိုင်ခွင့် ဗီစာရထားတဲ့ ဘာသာစကားကျွမ်းကျင်သူများကို အလုပ်သမားဥပဒေစတဲ့ လိုအပ်ရာ သင်တန်းပေးပြီး မွေးထုတ်ရပါမယ်။ လက်ရှိ အလုပ်သမားရေး ဆောင်ရွက်နေသူ ကျွမ်းကျင်သူများကလည်း ၀ိုင်းဝန်း သင်ကြားပေးဖို့လိုပါတယ်။

ကျွမ်းကျင်တဲ့ မြန်မာဝန်ထမ်း လက်ဝယ် မရသေးမီ အတွေ့အကြုံယူစဉ်ကာလတွင်း အလုပ်သမားပြသနာ ဖြေရှင်းသည့် စင်တာများမှ အတွေ့အကြုံရှိ ကိုရီးယားနိုင်ငံသား လှုပ်ရှားသူများနှင့် ချိတ်ဆက်လုပ်ဆောင်သင့်ပါတယ်။ ဒီမိုကရက်တစ် ရှေ့နေများအဖွဲ့ အကူအညီဖြင့် ဥပဒေပိုင်းဆိုင်ရာအထောက်အကူပြုပေးနိုင်မယ့် အလုပ်သမားရှေ့နေတွေကိုလည်း စေတနာ့ဝန်ထမ်းအဖြစ် ချိတ်ဆက်ထားရပါမယ်။

ထို့ပြင် သမဂ္ဂ၀င်များအတွက် လုပ်ငန်းခွင်ဆိုင်ရာ၊ ကိုရီးယားနိုင်ငံဆိုင်ရာ အထွေထွေသင်တန်းများကိုလည်း သမဂ္ဂမှ ဦးဆောင်စီစဉ်
ပေးရမှာဖြစ်သလို သမဂ္ဂ၀င်များကလည်း မသင်မနေရ အဖြစ် လေ့လာသင်ယူရင်း မိမိတို့ရဲ့ ဘ၀လုံခြုံရေးအတွက် ကြိုးပမ်းကြရပါမယ်။ သမဂ္ဂ၀င်များအနေနဲ့ လစဉ်ကြေးမှန်မှန်ပေးရုံ အကူညီလိုမှ ဆက်သွယ် ပုံစံမျိုးနဲ့ သမဂ္ဂကို မ၀န်းရံသင့်ပါ။
သမဂ္ဂမှ သတ်မှတ်ထားတဲ့ ကူညီပေးမယ့် ခေါင်းစဉ်များအောက်မှာ မပါဝင်တဲ့ တောင်းဆိုမှုမျိုးကိုလည်း မတောင်းဆိုဖို့ စောင့်ထိမ်းပေးရပါမယ်။

သမဂ္ဂဟာ ကိုရီးယားရောက်မြန်မာအလုပ်သမားများ ဘ၀ လုံခြုံရေး၊ တရားဥပဒေအောက်မှာ မျှတစွာခံစားခွင့်ရရေး၊ အသိဥာဏ်ပညာတိုးပွားရေးတို့ကို ထမ်းဆောင်ပေးရမှာဖြစ်သလို အနာဂတ်မြန်မာနိုင်ငံတော်အတွက် လူ့စွမ်းအားများ ကို မွေးထုတ်ပေးခြင်းဖြင့် တိုင်းပြည်အကျိုးကို တဘက်တလမ်းက ထမ်းဆောင်ပေးရမှာဖြစ်ပါတယ်။

အားလုံး ဘ၀တွေ အေးချမ်းလုံခြုံ စိတ်ချမ်းသာ ကိုယ်ချမ်းသာကြပါစေလို့ ရင်ထဲကနေ ဆုတောင်းပါတယ်။
စိုးမိုးသူ

No comments: