ဝံပုလွေရဲ့ ဘာမှမရှိခြင်းဥယျာဉ်

ရေးသားသူ — ကဗျာဆရာ နေမျိုး

ပင်လယ်များကို ဖြတ်သန်းခြင်း


ကျွန်တော်ဟာ ကဗျာရေးနေမိတဲ့အတွက် ကိုယ့်ကိုကိုယ် မုန်းတီးမိတဲ့အခါတွေတောင် ရှိပါတယ်။ တစ်ခါတလေမှာတော့ ကဗျာရေးနိုင်တဲ့အတွက် ကျေနပ်မိတယ်။ နည်းနည်းပိုပြောရရင် တချို့ကဗျာတွေအတွက် တခမ်းတနား ဂုဏ်ယူမိပါရဲ့။ များသောအားဖြင့် ကဗျာရေးခြင်း၊ မရေးခြင်းအပေါ်မှာ သာမန်ခံစားမှုမျိုးနဲ့ပဲ ဖြတ်သန်းနေပါတယ်။ ကျွန်တော့်မှာ စိတ်လှုပ်ရှားလွယ်ပြီး စူးစိုက်တတ်တဲ့ ခံစားမှုမျိုးလည်း ရှိနေပြန်တယ်။ စိတ်လှုပ်ရှားမှုတစ်ခုက နင့်နေအောင်ခံစားရပြီး အဲဒီခံစားမှုဟာ အစစ်အမှန်မဟုတ်တဲ့ ကမ္ဘာလောကတစ်ခုထဲကို ရောက်ရှိသွားစေခဲ့တယ်။ အစစ်အမှန်မဟုတ်တဲ့ ဒီကမ္ဘာလောကမှာ ပြောမပြတတ်အောင်ဘဲ ၀မ်းနည်းခဲ့ရ၊ ပြောမပြတတ်အောင်ဘဲ ပျော်ရွှင်ခဲ့ရ၊ အဲဒါတွေ ကင်းစင်သွားချိန်မှ အစစ်အမှန်ကမ္ဘာလောကထဲကို ကျွန်တော်ပြန်ရောက်လာတယ်။ ကျွန်တော် အသေအချာ ပြောနိုင်ပါတယ်။ အဲဒီအစစ်အမှန်ကမ္ဘာလောကထဲမှာလည်း ၀မ်းနည်းဖွယ်ရာ၊ ပျော်ရွှင်ဖွယ်ရာတွေ အပြည့်နဲ့ပါ။ ကျွန်တော်နဲ့သက်ဆိုင်ခြင်း ရှိတာ မရှိတာကတော့ ပြောပြဖို့ခက်ပါတယ်။ ဘာကြောင့်လဲဆိုတော့ ကျွန်တော်ကိုင်တွယ်ကြည့်လိုက်မိတာနဲ့ ၀မ်းနည်းဖွယ်၊ ပျော်ရွှင်ဖွယ် အရာတွေက ကျွန်တော့်ကို အစစ်အမှန်မဟုတ်တဲ့ ကမ္ဘာလောကထဲ ရောက်ရှိသွားစေလို့ပါပဲ။ ကဗျာဆရာဆိုတာ ပျော်ရွှင်ဖို့ပဲဖြစ်ဖြစ်၊ ၀မ်းနည်းဖို့ပဲဖြစ်ဖြစ် အမြဲတမ်း အဆင်သင့်ဖြစ်နေသူတွေပါ။ ၂၄နာရီ အသင့်ဖြစ်နေသူတွေပါ။ သင်ပျော်ရွှင်ရင် သူရယ်မောပြီး၊ သင် ၀မ်းနည်းရင် သူငိုလိမ့်မယ်။ အဲဒါ ကဗျာဆရာပါပဲလေ။ ကျွန်တော်ကတော့ ကျွန်တော့်ကဗျာကြောင့်ပဲ မပျော်ရွှင်နိုင်ဖြစ်ခဲ့ဖူးရဲ့။ ပိုပြီးဆိုးတာက ကျွန်တော့် တချို့ကဗျာတွေကို တခြားသူတွေဖတ်မိမှာ စိုးရိမ်တာမျိုးပေါ့။ ဒါပေမယ့် ပြောပြီးသားစကားကို နောက်တစ်ကြိမ်ပြန်ပြီး အလေးအနက်ပြောရရင် တချို့ကဗျာတွေအတွက် တခမ်းတနားဂုဏ်ယူမိပါရဲ့။ ကဗျာတစ်ပုဒ်ထက် ကဗျာဆရာရဲ့ဘ၀ဟာ နားလည်ရပိုခက်တယ်လို့ ကျွန်တော်ပြောလိုက်ပါတယ်။ ဒါပေမယ့် ကဗျာကို ခင်မင်ပါ။ ကဗျာကို တန်ဖိုးထားပါ။ ဖြစ်နိုင်ရင် ချစ်မြတ်နိုးပါ။ သဘာဝကြီးရဲ့အရသာကို ခံစားချင်ရင် မပွင့်သေးတဲ့ ပန်းကလေးတစ်ပွင့်အနားမှာ ငြိမ်ငြိမ်သက်သက် ရပ်နေပါ။ မိုက်မဲမှုအရသာကို ခံစားချင်ရင်တော့ အရက်ပြင်းပြင်း တစ်ခွက်လောက်သောက်ပါ။ ရိုးသားမှုရဲ့စည်းစိမ်ကို ခံစားချင်ရင်တော့ ကဗျာတစ်ပုဒ်ကို ဖတ်ပါလေ။….လို့ အစချီထားတဲ့ ကဗျာဆရာ နေမျိုးရဲ့ ကဗျာဆရာဝံပုလွေ ခေတ်ပေါ်ကဗျာစာအုပ်လေးကို ၂၀၁၀ ရောက်မှ ပြန်ဖတ်နေမိတယ်။ ဖတ်မိတဲ့အထဲက ကျနော့်ကို လာငြိတွယ်နေတဲ့ ကဗျာလေးတစ်ပုဒ်ကို မျှဝေလိုက်ပါတယ်။ ဖတ်ဖူးကြတဲ့သူတွေလည်း ရှိပါလိမ့်မယ်။ ပြန်ခံစားကြည့်ကြတာပေါ့ဗျာ… … …။

ဘာမှမရှိခြင်းဥယျာဉ်


လိုက်မလား ခင်
ဘာမှမရှိခြင်းဥယျာဉ်ကို
ပုံပြင်လိုလို တကယ်လိုလို
ကောလာဟလလိုလို ဖြစ်ရပ်မှန်လိုလို
ငါတို့သိခဲ့ကြဖူးတဲ့ ဘာမှမရှိခြင်းဥယျာဉ်ကိုလေ

ဘာမှမရှိခြင်းဥယျာဉ်ဟာ နတ္ထိမြို့မှာရှိသတဲ့
နတ္ထိမြို့ဟာ ကမ္ဘာ့မြေပုံရဲ့ အပေါ်မှာလား
နတ္ထိမြို့ဟာ အဝေးကြီးမှာလား
နတ္ထိမြို့ဟာ နီးနီးကလေးမှာလား

ငါတို့ သွားကြမယ် ခင်
ဘာမှမရှိခြင်းဥယျာဉ်ကို
ဘာမှမရှိခြင်းဥယျာဉ်မှာ တံခါးလည်း မရှိဘူးတဲ့
ဘာမှမရှိခြင်းဥယျာဉ်မှာ ဂိတ်ပေါက်အစောင့်လည်း မရှိဘူးတဲ့
ဘာမှမရှိခြင်းဥယျာဉ်မှာ မရှိပင်တွေရှင်သန်ပေါက်ရောက်သတဲ့
သိပ်လှတာပဲတဲ့ကွယ်
မရှိပင်တွေက မမြင်ရတဲ့ပန်းတွေ ဖူးပွင့်ချိန်ဆို
ဘာမှမရှိခြင်းဥယျာဉ်ဟာ သိပ်ခမ်းနားလာတော့တယ် တဲ့
လေထဲမှာလည်း မွှေးရနံ့တွေ ထုံအီနေလိမ့်မယ်လို့ ထင်မိတယ်
ပန်းချီဆရာ အဘိုးကြီးတစ်ယောက်ဟာ
မမြင်ရတဲ့ပန်းတွေ ဖူးပွင့်ချိန်ဆို
ဘာမှမရှိခြင်းဥယျာဉ်ကို မှန်မှန်ရောက်လာတတ်သတဲ့
ဒြပ်မဲ့ပန်းချီကားတွေဆွဲဖို့လေ
ဘာမှမရှိခြင်းဥယျာဉ်ထဲမှာ
မရေးရသေးတဲ့ ၀တ္ထုတွေထဲကဇာတ်ကောင်တွေ ရောက်ရောက်လာပြီး
ဟိုဟိုဒီဒီ လှည့်လည်သွားလာကျက်စားကြသတဲ့ကွယ်
ဘာမှမရှိခြင်းဥယျာဉ်ထဲမှာ ငှက်ကလေးတွေ
လူးလာပျံသန်းလို့ ငါတို့မြင်တွေ့နိုင်ဖို့မလွယ်ကူနိုင်တဲ့ ငှက်ကလေးတွေပေါ့

ဘာမှမရှိခြင်းဥယျာဉ်ထဲမှာ ငှက်ကလေးတွေ
အော်မြည်လို့ ငါတို့ကြားနိုင်ဖို့မလွယ်ကူတဲ့အသံနဲ့ပေါ့
ဘာမှမရှိခြင်းဥယျာဉ်ရဲ့ လျှို့ဝှက်တဲ့တစ်နေရာမှာ
အဖိုးတန်သေတ္တာတစ်လုံးကို ဘယ်သူမှမသိအောင်
မြှုပ်နှံထားသတဲ့ ဒါပေမယ့်
အဲဒီသေတ္တာထဲမှာ ဘာမှမရှိပါဘူးကွယ်

ဘာမှမရှိခြင်းဥယျာဉ်ဟာ ဘယ်အချိန်ကတည်းက ရှိနေခဲ့တာလဲ
ဘယ်သူမှမသိကြဘူးတဲ့
ဘာမှမရှိခြင်းဥယျာဉ်ကို ဘယ်လိုတည်ဆောက်ခဲ့တာလဲ
ဒါကိုလည်း ဘယ်သူမှသိပ်မသိကြသေးဘူးကွဲ့
ဘာမှမရှိခြင်းဥယျာဉ်မှာ ရယ်စရာတွေမရှိဘူးတဲ့
ဘာမှမရှိခြင်းဥယျာဉ်မှာ ငိုစရာတွေမရှိဘူးတဲ့

ဘာမှမရှိခြင်းဥယျာဉ်မှာ
မရှိပင်တွေက မမြင်ရတဲ့ပန်းတွေဖူးပွင့်ချိန်ရောက်ပြန်ပေါ့
လိုက်မလား ခင်
ဘာမှမရှိခြင်းဥယျာဉ်ကို။

နေမျိုး

ပုံလေးက ဒီက