မြန်မာ့ဥပဒေများသုတေသနနှင့်လေ့လာရေးအသင်းဖွဲ့စည်းမည်

ဒုံကုတက္ကသိုလ် (Dongkuk University) ဥပဒေဌာန ပါမောက္ခနှင့် မိတ်ဆွေ ကိုရီးယားရှေ့နေများ ၊ မြန်မာ့အရေး စိတ်ပါဝင်စားသူများ ဦးဆောင်မှုဖြင့် မြန်မာ့ဥပဒေများ သုတေသနနှင့် လေ့လာရေး အသင်း (한국버마법연구회) ကိုထူထောင်ဖွဲ့စည်းရန် စီစဉ်ဆောင်ရွက်နေကြောင်း သတင်းရရှိသည် ။

အဆိုပါအသင်းသည် မြန်မာနိုင်ငံ၏ ဥပဒေများကို ကိုရီးယားဥပဒေနှင့်နှိုင်းယှဉ်လေ့လာခြင်း ၊ နိုင်ငံတကာဥပဒေများနှင့် နှိုင်းယှဉ်လေ့လာသုတေသနပြုခြင်း တို့ကို ဆောင်ရွက် သွားမည် ဖြစ်ကြောင်း ၊ ထိုသို့လေ့လာရာတွင် သက်ဆိုင်ရာကဏ္ဍအလိုက် ကျွမ်းကျင် နှံ့စပ်မှုရှိသည့် ပုဂ္ဂိုလ်များဖိတ်ခေါ်ပြီး ၊ ဆွေးနွေးပွဲများ ပြုလုပ်ကာ ဆွေးနွေးအဖြေရှာသည့်ပုံစံကို အဓိကထား သုတေသနပြုလေ့လာ မည်ဖြစ်ကြောင်းနှင့် လေ့လာတွေ့ရှိချက်များကို မြန်မာနိုင်ငံ တိုးတက်ဖွံ့ဖြိုးရေး အလို့ငှာ ဗဟု မီဒီယာများမှတစ်ဆင့် ကမ္ဘာ့ပြည်သူများသို့ ကိုရီးယား အင်္ဂလိပ် မြန်မာဘာသာများဖြင့် အသိပေးတင်ပြခြင်း ၊ စာစောင်များ ထုတ်ဝေခြင်း ၊ သက်ဆိုင်ရာသို့ အကြံပြုတင်ပြခြင်း စသည်တို့ကို ဆောင်ရွက်သွားမည်ဖြစ်ကြောင်း အသင်း ဖွဲ့စည်းရေး ဦးဆောင်ဦးရွက်ပြုနေသူ ပါမောက္ခ လီချန်းဆုက ပြောသည် ။
ကိုရီးယားနိုင်ငံသို့ရောက်ရှိနေသည့် မြန်မာရှေ့နေများ (Lawyers) ၊ ရှေ့နေ မဟုတ်သော်လည်း ဥပဒေဘွဲ့ (LL.B, LL.M, B.A (Law) etc.) ရများ ၊ အထက်တန်းရှေ့နေ(H.G.P)စာမေးပွဲ သို့မဟုတ် တရားရုံးချုပ်ရှေ့နေ (Advocate) စာမေးပွဲအောင်မြင်ထားသူများ ၊ မှတ်ပုံတင်ရှေ့နေ (R.L)သင်တန်းဆင်းများ ၊ စီးပွါးရေးဥပဒေ ဒီပလိုမာ (D.B.L) သို့မဟုတ် ဥပဒေဒီပလိုမာ (Dip. in Law) ရရှိထားသူများ စသည်ဖြင့် ဥပဒေဘာသာရပ်ကို တစ်စုံတစ်ခုသော အတိုင်းအတာအထိ တတ်သိထားသူများ ၀၁၀-၂၃၃၁-၂၄၅၇ ထံသို့ မြန်မာဘာသာဖြင့်ဖြစ်စေ ၀၁၇-၇၁၇-၀၀၆၂ ထံသို့ ကိုရီးယား ဘာသာဖြင့်ဖြစ်စေ ဆက်သွယ်နိုင်ကြကြောင်း သိရသည် ။

ယခုအခါ စီစဉ်ဆဲကာလဖြစ်ပြီး ဆွေးနွေးပွဲများကို ဒုံကု တက္ကသိုလ်(Dongkuk University)တွင် မတ်လ ၂၅ ရက်နေ့ (သောကြာနေ့) ညနေ ၇ နာရီမှ အစပြုကာ အစီအစဉ်များအတိုင်း စက်တင်္ဘလာလကုန်အထိ ဆက်တိုက်ကျင်းပသွားမည်ဖြစ်ကြောင်း အသေးစိတ် အစီအစဉ်များသိရှိလိုပါက အထက်ပါ ဖုန်းနံပတ်များထံ ဆက်သွယ်မေးမြန်းနိုင်ကြောင်း ၊ ကိုရီးယားဘာသာ အားနည်းသူများအတွက် ဘာသာပြန်များလည်း စီစဉ်ထားကြောင်း သိရသည် ။