ကားဝယ်ရန် ငွေစာရင်းဖွင့်ရေး လတ်တလောအဆင်မပြေ

မြန်မာနိုင်ငံသားတိုင်း ကားတင်သွင်းနိုင်ရန် နိုင်ငံခြားငွေစာရင်းဖွင့်နိုင်သည့် ဘဏ်များတွင် နိုင်ငံခြားငွေသွင်းကာ စာရင်းဖွင့်နိုင်မည်ဟု စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဦးပွင့်ဆန်းက မေလ ၇ ရက်နေ့က နေပြည်တော် သတင်းစာရှင်းလင်းပွဲ၌ ပြောကြားထားသော်လည်း အဆိုပါဘဏ်များတွင် နိုင်ငံသားတိုင်းကို ဘဏ်စာရင်းဖွင့်လှစ်ပေးရန် ညွှန်ကြားချက်မရသေး၍ လတ်တလော၌ အဆင်မပြေသေးကြောင်း အဆိုပါဘဏ်များထံမှ စုံစမ်း သိရှိရသည်။
လတ်တလောတွင် နိုင်ငံခြားငွေစာရင်းဖွင့်လှစ်နိုင်သည့် မြန်မာ့စီးပွားရေးဘဏ်၊ မြန်မာ့နိုင်ငံခြား ကုန်သွယ်မှုဘဏ်နှင့် မြန်မာ့ရင်းနှီးမြှုပ်နှံမှုနှင့် ကူးသန်းရောင်းဝယ်ရေးဘဏ်တို့တွင် နိုင်ငံခြားဝင်ငွေရရှိသည့် သင်္ဘောသားများ၊ပြည်ပအလုပ်သမား (Shore Job) များကိုသာ ဘဏ်စာရင်းများဖွင့်လှစ်ပေးနေကြောင်း မြန်မာ့နိုင်ငံခြားကုန်သွယ်မှု ဘဏ်ငွေစာရင်းဖွင့်သည့်ကောင်တာမှ စုံစမ်းသိရှိရသည်။
နိုင်ငံခြားဘဏ်လုပ်ငန်း လုပ်ပိုင်ခွင့်ရသည့် ပုဂ္ဂလိကဘဏ်များတွင် ဘဏ်စာရင်းဖွင့်နိုင်သည်ဟုဆိုသဖြင့် နိုင်ငံခြားဘဏ်လုပ်ငန်းလုပ်ကိုင်ခွင့်ရသည့် ဘဏ်များသို့ ဆက်သွယ်မေးမြန်းရာတွင် ၄င်းတို့၌ နိုင်ငံခြားနှင့် ချိတ်ဆက်သည့်ှSwift (ကမ္ဘာလုံးဆိုင်ရာဘဏ်အချင်းချင်း ငွေကြေးဆိုင်ရာဆက်သွယ်သည့်စနစ်) မရှိသေးသဖြင့် မဖြစ်နိုင်သေးကြောင်း ပြန်လည် ဖြေကြားကြသည် ။
''ပုဂ္ဂလိကဘဏ်တွေမှာ နိုင်ငံခြားစာရင်းဖွင့်နိုင်ဖို့က ဘဏ္ဍာရေးဝန်ကြီးနဲ့ ညှိနှိုင်းရဦးမှာပါ'' ဟု စီးပွားရေးနှင့် ကူးသန်းရောင်းဝယ်ရေးဝန်ကြီးဌာန အကြံပေးဒေါက်တာမောင်အောင်က ပြောကြားသည်။
နိုင်ငံသားတိုင်းကို နိုင်ငံခြားဘဏ် စာရင်းဖွင့်လှစ်ခွင့်ပေးမည်ဆိုလျှင် မြန်မာ့နိုင်ငံခြားကုန်သွယ်မှုဘဏ်၊ မြန်မာ့ရင်းနှီးမြှုပ်နှံမှုနှင့် ကူးသန်းရောင်းဝယ် ရေးဘဏ်နှင့် မြန်မာ့စီးပွားရေးဘဏ်တို့ရှိ ဝန်ထမ်းအရေအတွက်နှင့် ဝန်ဆောင်မှုအင်အားလုံလောက်မှုမရှိနိုင်ကြောင်း၊ လတ်တလောတွင်ပင် ဘဏ်စာအုပ်အသစ်များ ကုန်သွားသဖြင့် အချို့ကို စာရင်းသာဖွင့်ပေးထားရကြောင်း ဘဏ်များနှင့် ဘဏ်စာရင်း ဖွင့်ရန် စုံစမ်းနေသူများထံမှသိရသည်။
''ကျွန်တော်က Shore Job အနေနဲ့ ဘဏ်စာရင်းဖွင့်ဖို့သွားတာ၊ မနေ့က (မေ ၉) မရသေးဘူးပြောလို့ ပြန်လာရတယ် ။ ဒီနေ့တော့ မသိသေးဘူး'' ဟု ဘဏ်စာရင်းဖွင့်ရန် ကြိုးပမ်းသူတစ်ဦး The Voice Weekly သို့ ပြောကြားသည်။
ဘဏ်စာရင်းဖွင့်လှစ်ထားပြီးသူများမှာလည်း ကားတင်သွင်းရန်လိုအပ်သည့် ငွေပမာဏမပြည့်လျှင် အခြားသူများ၏နိုင်ငံခြားငွေစာရင်းမှ လွှဲပြောင်းဝယ်ယူနိုင်ပြီး တရားဝင်ဖွင့်လှစ်ထားသည့် ငွေလဲကောင်တာမှငွေကိုဝယ်ယူကာ အဆိုပါဘဏ်များရှိ စာရင်းတွင် ထည့်သွင်းလျှင်လည်းရပြီး ဝန်ဆောင်ခ ဝ ဒသမ ၃ ရာခိုင်နှုန်းပေးရမည်ဟု ဗဟိုဘဏ်ကဘဏ်များသို့ ညွှန်ကြားချက်ထုတ်ပြန်ထားကြောင်း စုံစမ်းသိရှိရသည်။ 
Ref: The Voice Weekly (8/21)