ရေးသားသူ - ဝင်းလှိုင်
ကျနော်ဟာ ဆရာရဲ့ ပရိသတ် တစ်ယောက်ဖြစ်သလို၊ ဆရာရဲ့ စာပေဟောပြောပွဲတွေကိုလည်း မလွတ်တမ်းနားထောင်တတ်သူပါ။ ဆရာဟာ မကြာခင်အချိန်တွေကစပြီး စစ်အစိုးရအလိုကျစကားတွေကို ပြောလာသလို၊ ဒီိမိုကရေစီဖက်တော်သားတွေကို ထိုးနှက်တဲ့ စကားလုံးတွေကိုသုံးနှုံး လာတာကို သတိပြုမိလာပါတယ်။ ဆရာဟာပြည်သူလေးစားတဲ့စာရေးဆရာတစ်ယောက် ဖြစ်ရဲ့သားနဲ့ ပြည်သူတွေဖက်က မရပ်တည်ဘဲနဲ့ စစ်အစိုးရဖက်ကလိုက်ပြီးဘာလို့ပြောနေရတာလဲဆိုတာနားမလည်နိုင်အောင်ဖြစ်ရပါတယ်။ ဆရာကိုစစ်အစိုးရက ဝယ်လိုက်ပြီလား၊ ဒါမှမဟုတ် ဆရာကိုယ်တိုင်ကပဲ အလကားမတ်တင်းနဲ့ ကိုယ့်ကိုကိုယ်ထိုးရောင်းလိုက်ပြီလားဆိုတာကိုတော့ ဆရာကိုယ်တိုင်ပဲ သိမယ်ထင်ပါတယ်။
(၄၊၁၂၊၂၀၁၃) ရက်နေ့ကလာတဲ့ အာဖက်အေ ညပိုင်းအစီအစဉ်မှာ ၂၀၀၈ ဖွဲ့စည်းပုံ ပြင်ဆင်ရေးနဲ့ပတ်သက်ပြီး ဒေါ်အောင်ဆန်းစုကြည် နဲ့ သမ္မတဦးသိန်းစိန်တို့အကြား ကမ်းလှမ်းမှု၊ တုန့်ပြန်မှု၊ နောက်ဆုံးအခြေအနေနဲ့ပတ်သက်ပြီး အင်တာဗျူးထားတာကို ဆရာဖြေကြားပုံနဲ့ပတ်သက် ပြီး အလိုမကျတဲ့ အတွက် ဒီစာကိုရေးလိုက်ရခြင်းဖြစ်ပါတယ်။ ကျနော်ဘာမှမဟုတ်ပါဘူး၊ ဒါပေမယ့် ကျနော်တို့ကိုးကွယ်တဲ့ ဗုဒ္ဓဘုရားရှင်ကိုယ်တော်တိုင် ကာလာမ ရွာသားတွေကိုဟောကြားတဲ့တရားတော်ထဲမှာ ငါဟောကြားတဲ့တရားတွေကို ကိုယ်တိုင်မကျင့်ကြံဘဲနဲ့ မယုံကြည်ဖို့ ၊ ကိုယ်တိုင်ကျင့်ကြံ ပြီး အကျိုးရှိတယ်ဆိုမှ ယုံကြည်လက်ခံဖို့ ဟောကြားထားတာဖြစ်ပါတယ်။ ဒါကိုကြည့်ခြင်းအားဖြင့် ဘုရားရှင်ကိုယ် တော်တိုင် သူဟောကြားတဲ့တရားတော်ကို အမှားအမှန်ဝေဖန်၊ ဆန်းစစ်ပြီး ကိုယ်တိုင်ကျင့်ကြံ အားထုတ်ပြီး တကယ်အကျိုးရှိတယ်ဆိုမှ လက်ခံ ခိုင်းထားတာကို တွေ့ရမှာဖြစ်ပါတယ်။ ဒါကြောင့် စာရေးဆရာဦးကျော်ဝင်းကို ဝေဖန်အကြံပြုတာကို အားလုံးနားလည် လက်ခံကြလိမ့်မယ်လို့ ယုံကြည်ပါတယ်။
ပထမဆုံးအနေနဲ့ ၂၀၀၈ ဖွဲ့စည်းပုံရေးဆွဲထားတဲ့ နောက်ခံသမိုင်းကြောင်းကို ဆရာဖြေကြားထားတာကတော့ “ ၂၀၀၈ အခြေခံဥပဒေ ကတော့ အရင် အစိုးရလက်ထက်ပေါ့ဗျာ၊ တိုင်းပြည်မှာ နိုင်ငံရေးအရ crisis တခုဖြစ်နေတော့ အဲဒီ crisis ကနေ ထွက်ပေါက်တခုရအောင် ဆိုပြီးတော့ အဲဒီတုန်းက ရှိနေတဲ့ နိုင်ငံရေးအင်အားစုတွေ အလုပ်လုပ်လို့ ရအောင် ဆိုတဲ့သဘောမျိုးနဲ့ ဖြစ်ပေါ်လာတဲ့ constitution ပေါ့၊ အဲဒီ တော့ အခြေအနေတခုအောက်မှာ ရေးဆွဲရတာ ဖြစ်တဲ့အတွက် ဒီမိုကရက်တစ် စံတွေနဲ့ ပြောမယ်ဆိုရင်တော့ ပြောစရာတွေအများကြီးပဲပေါ့ဗျာ.. အဲဒီကတည်းက ကျနော်တို့က စံတွေနဲ့သိပ်မကြည့်ဘူးဗျ၊ အလုပ်လုပ်လို့ရမရ…….” ဆိုတဲ့ စကားရပ်ကိုကြည့်ခြင်းအားဖြင့် ဆရာဟာ သမိုင်းအမှန်ကို တကယ်မသိတာလို့တော့မထင်ပါဘူး။ သိရဲ့သားနဲ့ ဘာလို့ တမင်ချန်ထားခဲ့တာလဲ ဆိုတာကိုတော့ မေးချင်ပါတယ်။ ၂၀၀၈ အခြေခံဥပဒေဟာ ပြည်သူတွေအတွက်ထွက်ပေါက်မဟုတ်ပါဘူးဆရာ။ စစ်အာဏာရှင်တွေအတွက်ထွက်ပေါက်ပါ။ ပြည်သူတွေအကျိုးအတွက်ရေးဆွဲခဲ့တာဆိုရင် ဒီလောက်နှစ်တွေကြာစရာမရှိပါဘူး။ တသက်လုံး မြန်မာပြည်ကို စစ်ကျွန်ပြုဖို့အတွက် ရေးဆွဲထားတာမို့ (၁၅)နှစ်ကြာခဲ့တာပါ။ သူတို့ရဲ့ အသက်အိုးအိမ်၊စည်းစိမ် လုံခြုံရေး အတွက်ရေးဆွဲထားတာဖြစ်တဲ့အတွက် ဒီအခြေခံဥပဒေကို ဘယ်သူမှမပြင်နိုင်အောင်လုပ်ထားခဲ့တာပါ။ ထပ်ရှင်းအောင်ပြောရရင် စစ်ခွေးတွေရေးဆွဲခဲ့တာမို့လို့ လူတွေပြင်ဖို့ခက်နေတာပါ။ NLD ဟာဘာကြောင့် ဒီညောင်နှစ်ပင်ညီလာခံက ထွက်ခဲ့ရသလဲ ဆိုရင် ဒီမိုကရက်တစ်စံတွေနဲ့ မရေးဆွဲဘဲ၊ စစ်ခွေးတွေအာဏာတည်မြဲရေးစံတွေနဲ့ ရေးဆွဲနေတာဖြစ်တဲ့အတွက် ဒီညီလာခံကို ကျောခိုင်းခဲ့တာဖြစ်ပါတယ်။ ယခုလက်ရှိ သမ္မတဦးသိန်းစိန်ဟာ အဲဒီတုန်းက ညီလာခံရဲ့ ဥက္ကဌတစ်ယောက်ပါ။
ဒုတိယမေးခွန်းကတော့ NLD ကလည်း ဖွဲ့စည်းပုံပြင်ဆင်ရေးနဲ့ပတ်သက်ပြီး လူထုသဘောထားတွေ၊ ဆန္ဒတွေကောက်ယူနေတာနဲ့ ပတ်သက်ပြီး ဆရာသဘောထားကိုမေးတဲ့အခါ “ အဲဒါကတော့ဗျာ.. လူထုဆန္ဒခံယူပွဲဆိုတာ ကျနော်တို့ နိုင်ငံအခြေအနေမျိုးမှာ သိပ်အယုံအကြည် မရှိဘူးဗျ။ ပွင့်ပွင့်လင်းလင်းပြောရရင် ကောက်တဲ့သူ ဖြစ်စေချင်တဲ့ဖက်ကို ဖြစ်သွားတာပဲများပါတယ်။ နောက်တခုကလူထုပေါ့ ၊လူထုကအရေးကြီး တယ်ဆိုပေမယ့် လက်ရှိအခြေအနေမျိုးမှာ လူထုဟာ ဒီလိုမဟာဗျူဟာ သဘောဆောင်တဲ့ အပြောင်းအလဲတွေကို ချည်းကပ်ဖို့တာဝန်လည်းမရှိဘူး၊ လုပ်ချင်စိတ်လည်းမရှိဘူး၊ ဒီထက်ပိုရှင်းရှင်းပြောရရင်ဗျာ အခြေခံဥပဒေဖတ်ဘူးတဲ့သူဘယ်နှယောက်ရှိမလဲ………..” လွတ်လပ်စွာပြောဆိုပိုင်ခွင့် ဆိုတာလူတိုင်းမှာရှိပါတယ်ဆရာ။ ဒါပေမယ့် နာဂစ်လေမုန်တိုင်းကြောင့် ပြည်သူတွေဒုက္ခရောက်နေတဲ့ အချိန်၊ ၂၀၀၈ ဖွဲ့စည်းပုံလူထုဆန္ဒခံယူပွဲ လုပ်တုန်းက ပြည်သူ့စာရေးဆရာတယောက်က ဘာကြောင့် ၂၀၀၈ ဖွဲ့စည်းပုံ လူထုဆန္ဒခံယူပွဲကို အယုံအကြည်မရှိပါဘူးလို့ မပြောခဲ့တာလဲ။ ဆရာမပြောရဲလို့မဟုတ်လား။ ဆရာဟာ NLD ကိုသာမကဘူး၊ လူထုကိုပါစော်ကားလိုက်တာလုိ့ခံစားရပါတယ်။ ဆရာပြောသလို ဒီအခြေခံဥပဒေဖတ် ဘူးတဲ့သူဘယ်နှယောက်ရှိသလဲတဲ့၊ မှန်ပါတယ်ဆရာ….အပြောင်းအလဲတွေလုပ်နေပါပြီဆိုပြီး ဝါဒဖြန့်လိမ်ညာနေတဲ့ ဗိုလ်သိန်းစိန်အစိုးရ လက်ထက်မှာ ပြည်သူတွေဟာ ပိုပြီးဆင်းရဲတွင်းနက်နေလို့၊ ထမင်းတလုတ် အတွက်ရုန်းကန်နေရလို့ ဒီအခြေခံဥပဒေကိုဖတ်ဖို့ အချိန်မရှိနိုင်ဘူးဆိုတာ ကိုလည်း ဆရာပိုသိမှာပါ။ ကျိန်းသေပေါက်ကျနော်ပြောနိုင်တာကတော့ ပြည်သူတွေအားလုံး ဒီအခြေခံဥပဒေစာအုပ်ကို ဖတ်ပြီးပြီဆိုရင်တော့ ပြင်ဖို့ တောင်းဆိုတော့မှာမဟုတ်ဘူးဆရာ။ အားလုံးမီးပုံရှို့ခိုင်းပြီး အသစ်ပြန်ရေးဆွဲခိုင်းလိမ့်မယ်။
တတိယမေးခွန်းကတော့ နိုင်ငံတကာ တောင်းဆိုနေကြသလို ဒီဖွဲ့စည်းပုံထဲမှာ ဒေါ်အောင်ဆန်းစုကြည်သမ္မတဖြစ်ရေးကို ကန့်သတ်ထား တဲ့ အချက်တွေကို ဖယ်ရှားပေးဖို့လိုတဲ့ ပြင်ဆင်ချက်မျိုးအထိ ဆရာအနေနဲ့လုပ်လာလိမ့်မယ်လို့ ဘယ်လိုထင်ပါသလဲ။ တကယ်လို့ ဒီအချက်တွေကို မပြင်နိုင် ဘူးဆိုရင်ကော ဘာတွေဖြစ်လာမယ်မှန်းဆမိပါသလဲ။ “ နိုင်ငံတကာက အကြံပေးရုံ၊ တိုက်တွန်းရုံလောက်နဲ့ဆို ကိစ္စမရှိဘူး။ ဖိအားဆိုတဲ့ သဘောမျိုး နဲ့ချည်းကပ်မယ်ဆိုရင်တော့ ပိုရှုပ်ကုန်မယ်ဗျ။ ဒါကဘာလို့လဲဆိုတော့ ပြည်တွင်းရေးဖြစ်နေတော့ ပြည်တွင်းနိုင်ငံရေးပါတီတွေဆုံးဖြတ်တာအကောင်း ဆုံးပဲ…………” လုပ်ချလိုက်ပြန်ပြီဆရာကတော့….ပြောရင်းပြောရင်းနဲ့ကို ပိုပိုဆိုးလာတယ်။ အာဏာရှင်တွေအဆက်ဆက်သုံး လာတဲ့ စကားလုံးတွေ ဆရာပါးစပ်ထဲကိုအကုန်ရောက်ကုန်တာ အံ့သြမိပါတယ်။ ဘာတဲ့ ပြည်တွင်းရေးတဲ့ ဟုတ်လားဆရာ..သူများပြည်တွင်းရေး ကိုမဆိုင်တဲ့သူတွေလာမရှုပ်ကြနဲ့လို့ ပြောနေသလိုကိုခံစားမိနေပါတယ်ဆရာ။ ကမ္ဘာကြီးဟာရွာကြီးဖြစ်နေပြီ၊ ကမ္ဘာကြီးပြားသွားပါပြီလို့ ရေးရေး နေတဲ့ဆရာဟာ ကမ္ဘာကြီးထဲမှာရှိနေတဲ့မြန်မာပြည်ကြီးကို တခြားဂြိုလ်တခုခုမှာရောက်သွားပြီလို့များ ထင်နေသလားဆရာ။ ဒီကမ္ဘာကြီးငြိမ်းချမ်းဖို့၊ ဒီကမ္ဘာလောကကြီးထဲမှာ နေထိုင်နေကြတဲ့လူသားတွေ ငြိ်မ်းချမ်းဖို့အတွက် ယဉ်ကျေးတဲ့ ကမ္ဘာ့လူမှုအသိုင်းအဝိုင်းက ပြောဆိုဝေဖန်နေရမယ်ဆရာ။ လိုအပ်ရင် အရေးယူ အပြစ်ပေးရမယ်ဆရာ။ ကြီးနိုင်ငယ်ညှင်းခေတ်ကြီးက အာဏာရှင်တိုင်းပြည်တွေမှာ၊ အစွန်းရောက်တဲ့ ဘာသာရေး အကြမ်းဖက်တဲ့ တိုင်းပြည်တွေမှာပဲရှိတော့တယ်ဆရာ။
ဆရာကို ကျနော်ဘယ်လိုနားလည် ရပါ့မလဲ။
အားလုံးကိုလေးစားလျက်
ဝင်းလှိုင် (၆၊၁၂၊၂၀၁၃)
No comments:
Post a Comment