ဒေါ်အောင်ဆန်းစုကြည် ( မအူပင်မြို့ ဖွဲ့စည်ပုံပြင်ဆင်ရေး ဟောပြောပွဲမှ မေလ ၁၀ ရက် ၂၀၁၄ )
“တပ်မတော်ထဲမှာ ရှိတဲ့ ပုဂ္ဂိုလ်တွေအားလုံးဟာ မွေးကတည်းက တပ်မတော်သား မဟုတ်ပါဘူး။ နိုင်ငံသားများအနေနဲ့ မွေးလာတာပါ။ နံပါတ် ၁ က နိုင်ငံသားတွေ ဖြစ်ပါတယ်။ နောက်တော့မှ တပ်ထဲရောက်လို့ တပ်မတော်သားတွေ ဖြစ်တာပါ။ အဲဒီတော့ ကိုယ့်ရဲ့ နိုင်ငံသားတာဝန်က နံပါတ် ၁ ဖြစ်ပါတယ်လို့ တပ်မတော်သားတွေကို သတိပေးချင်ပါတယ်။ နံပါတ် ၁ ဖြစ်တဲ့ အဓိကအကျဆုံး တာဝန်ကို မကျေပွန်ဘဲနဲ့ တခြားတာဝန်ကို ဘယ်လိုကျေပွန်နိုင်မှာလဲလို့ ကိုယ့်ကို ကိုယ် မေးခွန်း ထုတ်ကြပါလို့ ကျမအနေနဲ့ ပြောချင်ပါတယ်။ တပ်မတော်ကို ဖေဖေ တည်ထောင်ခဲ့စဉ်အခါတုန်းက ပြည်သူလူထုအတွက်၊ ပြည်သူလူထုက တပ်မတော်အပေါ်မှာ ချစ်ခင်လေးစား ကြည်ညိုနိုင်ဖို့ ဖြစ်ရေးဆိုပြီးတော့ ထူထောင်ခဲ့တာပါ။ ဘယ်ပါတီ ဘယ်အုပ်စုအတွက်မှ မဟုတ်ပါဘူးဆိုတာ သေသေချာချာ ဖေဖေက ပြောခဲ့ပါတယ်။ တပ်မတော်သားများ အားလုံးလည်း ဒီဖွဲ့စည်းပုံ အခြေခံ ဥပဒေ ပြင်ဆင်ရေးမှာ တက်တက်ကြွကြွနဲ့ ပါဝင်ကြပါလို့ ပြောချင်တယ်။ တာဝန်အရ ပါဝင်ကြပါလို့ ကျမပြောချင် တယ်” လို့ ဒေါ်အောင်ဆန်းစုကြည် ပြောဆိုပါတယ်။
ဗိုလ်မှူးကြီးဌေးနိုင်
တပ်မတော်သား ပြည်သူ့လွှတ်တော်ကိုယ်စားလှယ်
ဥပဒေ ပြင်ဆင်ရေးမှာ ၄၃၆ ကတော့ မူတည်တာပေါ့။ သူ(ဒေါ်အောင်ဆန်းစုကြည်) က ဘယ်လိုပဲပြောပြော ကျနော်တို့ရဲ့ ခံယူချက်က ပြင်သင့်တာ တော့ ရှိတာပေါ့။ ပြင်ရမှာပဲလေ။ လွှတ်တော်မှာလဲ ကော်မတီဖွဲ့ပြီးတော့ လုပ်နေတာပဲလေ။ ပူးပေါင်းဖို့က ကျနော်တို့လည်း ပါနေတာပဲလေ။ သူတို့က ကျနော်တို့အပေါ်ကို ဘယ်လိုသဘောထားလဲတော့ မသိဘူးလေ။ နိုင်ငံရေး လုပ်ချင်ရင် တပ်က ထွက်လို့ ပြောတာကို မကြိုက်ဘူး။ ကျနော်တို့လည်း တိုင်းပြည်ချစ်လို့ စစ်တပ်ထဲ ၀င်လာ တာလေ။ တပ်မတော်သားဆိုတာက နိုင်ငံခြားက လာတဲ့ သူတွေမဟုတ်ဘူး။ ပြည်သူထဲက ပြည်သူတွေပဲ။ နိုင်ငံ ကောင်းဖို့၊ တပ်မတော် ကောင်းဖို့ စသဖြင့်လုပ်နေတာပဲ။ ၀င်လာထဲ ကလည်း တပ်မတော်သား သည် ပြည်ထောင်စုရဲ့ သားသမီး တွေပဲ။ ကျနော်တို့တပ်မတော်သားတွေက နိုင်ငံတော်ကောင်း အောင်လုပ်နေတာပဲ။ လွှတ်တော်ထဲမှာလဲ နိုင်ငံ ကောင်းဖို့ ကြိုးစား ဆောင်ရွက်နေတာပဲ။ ဒီလိုပဲခံယူထားတယ်။ အာဏာမမက်ရင် အခြေခံဥပဒေ ပြင်ဆင်ပေးဖို့ ပြောတာက ပြောတဲ့ သူရဲ့ တာဝန်ပဲလေ။ သူပြောသလို သူဘာသာ တာဝန်ယူသွားရမှာပဲလေ။ လွှတ်တော်တွင်းမှာရှိနေစဉ်လည်း ဘယ်သူ့ ကိုမှ ဒုက္ခမပေးပဲ နိုင်ငံကောင်းဖို့အတွက်။ ကျနော်တို့က ဒို့တာဝန် အရေး ၃ ပါးကို ကာကွယ်စောင့်ရှောက်ရမှာပဲ။ ဒါကို တော့ လုံးဝ ထိပါးခံ လို့တော့မရဘူး။ (ဧရာဝတီ - ၁၉၊၅၊၂၀၁၄)
သုံးသပ်ချက် - တပ်မတော်သားတွေ လွှတ်တော်ထဲမှာ ဝင်ထိုင်နေတာ ဒို့တာဝန်အရေး(၃)ပါးကို ကာကွယ်စောင့်ရှောက်ဖို့ဆိုပဲ။ ဒို့တာဝန်အရေး (၃)ပါး မှာ နောက်ဆုံးအချက်ဖြစ်တဲ့ အချုပ်အခြာ၊အာဏာ တည်တံ့ခိုင်မြဲရေးဆိုတာ တိုင်းပြည်အတွက် (သို့မဟုတ်) ပြည်သူ၊ပြည်သားတွေအတွက် အချုပ်အခြာလား။ ခင်ဗျားတို့ အဘတွေအတွက် အချုပ်အခြာလားဆိုတာကို သေချာစဉ်းစားပြီးတော့ အဖြေပေးပါ ဗိုလ်ဌေးနိုင်။
ဒုတိယဗိုလ်မှူးကြီးဟောင်းဦးလှဆွေ
မကွေးတိုင်းဒေသကြီးမှ အမျိုးသားလွှတ်တော်ကိုယ်စားလှယ်၊ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ
သူတို့က ပုဒ်မ ၄၃၆ ကို ပြင်ပေးပါ ဆိုပြီးတော့ ကုန်းအော်နေတယ်။ အသည်းအသန်ကို ပြောနေတာပေါ့လေ။ အဲဒီလို ပြောတဲ့အခါမှာ တပ်မတော်ကရော ၊ သမ္မတကရော ၊ ဦးရွေမန်းကရော အခြေခံ ဥပဒေထဲမှာ ရှိတဲ့ ပြင်သင့် ပြင်ထိုက်တာ တွေ ပြင်မယ်လို့ ပြောတယ်။ ပြင်မယ်လို့ ပြောရင် ၄၃၆ ဆိုတဲ့ ဂိတ်ကြီးကို ဖြတ်ရမယ်။
၄၃၆ ဆိုတဲ့ ဂိတ်ကြီးကို ဖြတ်မှ အထဲက ပုဒ်မ ၁ ၊ ၂ ၊ ၃ ၊ ၄ ၊ ၅ ၊ ၆ ၊ ၇ ဆိုတဲ့ ပုဒ်မတွေက ပြင်လို့ရမှာ ။ ဒီ ၄၃၆ ကြီးကို ဟပေးလိုက်မှ အထဲထဲကို ၀င်လို့ရမှာ ဖြစ်တဲ့အတွက် ပြင်မယ်လို့ တပ်မတော်ကရော ၊ သမ္မတ ကရော ၊ ဦးရွှေမန်းကရော ပြောထားပြီး ဖြစ်တဲ့အတွက် ၄၃၆ ဆိုတဲ့ ဂိတ်ကြီးဟာ အလိုအလျောက် ပွင့်ပြီးသားလို့ ပြောချင်တယ်။ ဆိုလိုတာက တပ်မတော်က လည်း ဒါကို ထောက်ခံမဲ ပေးမှာပဲ။ ကြံခိုင်ရေးကလည်း ထောက်ခံမဲ ပေးမှာပဲ။ ဘယ်သူမှ မကန့်ကွက်လို့ ရှိရင် ၄၃၆ ကြီးက Pass ဖြစ်သွား မှာပဲ။ ၄၃၆ ကြီးအတွက်ကို ပူစရာ မလိုတော့ဘူးလို့ ကျနော်က မြင်တယ်။ ဒါပေမယ့် တပ်က ပြင်ပေးပါမယ်လို့ ပြောထား တာကို တမင်တကာ ဇတ်နာအောင် သူတို့ ပြောလို့ပဲ တပ်ကပြင်ပေးရတယ် ဆိုတဲ့ ပုံဖြစ်အောင် လုပ်နေတာ။ ပြင်စရာ ရှိတာ ပြင်ပေးမယ်လို့ ပြောထားပြီးသားပဲ။ တပ်က ပြင်ဖို့ရှိတဲ့ အချက်အလက် တွေ အကုန်လုံး ပေးပြီးပြီလို့တောင် ကျနော်တို့ သတင်း ရထားတယ်။ (ဧရာဝတီ - ၁၉၊၅၊၂၀၁၄)
သုံးသပ်ချက် - ဒါဆိုရင် မြန်မြန်အကောင်အထည်ဖော်ပြီး ပြင်လေ။ ဘာလို့ ဝေ့လည်ကြောင်ပတ် လုပ်နေရတာလဲ။ တိုင်းပြည်အတွက် ဒီလောက်အရေးကြီးတဲ့ ဖွဲ့စည်းပုံပြင်ဆင်ရေးကို မလုပ်ဘဲနဲ့ အရေးမကြီးတဲ့ မျိုးစောင့်ဥပဒေကို ရှေ့တန်းတင်ပြီး ဆောင်ရွက်နေတာ ဘာသဘောလဲ။
ဗိုလ်မှူးကြီးဟောင်းဦးမင်းဆွေ
ဒိုက်ဦးမြို့နယ် ပြည်သူ့လွှတ်တော် ကိုယ်စားလှယ်၊ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ
အခု စစ်တပ်က ကာကွယ်ရေး ၀န်ကြီး၊ စစ်ထောက်ချုပ် စတဲ့သူတွေက ဘာတွေ လုပ်ပိုင်ခွင့် ရှိနေလဲ။ အရင် န၀တ၊ နအဖ ခေတ်တုံးက ကာကွယ်ရေးဝန်ကြီး၊ စစ်ထောက်ချုပ်၊ ဗိုလ်မှူးချုပ်၊ တိုင်းမှူးတွေကအစ ဘာတွေ လုပ်ပိုင်ခွင့်ရှိလဲ ဆိုတာ သေချာ လေ့လာလိုက်ရင် စစ်တပ်က အာဏာမက်တယ်ဆိုတာကို သူတို့ ပြောမှာမဟုတ်ဘူး။ စစ်တပ်မှာ ဘာမှ အာဏာ မရှိပါဘူး။ စစ်တပ်က ဘတ်ဂျက်ဆိုလည်း ပြည်ထောင်စုလွှတ်တော်က ခွင့်ပြုတဲ့ဟာကိုပဲ သူတို့ သုံးလို့ရတယ်။ အစိုးရက ကာကွယ်ရေး ဦးစီးချုပ် ခန့်အပ်ဖို့တောင်မှ ကာကွယ်ရေး ဦးစီးချုပ် ရွေးချယ်ရေး အဖွဲ့ဆိုတာ ရှိတယ်။ ရှင်းရှင်း ပြောရရင် တပ်မှာ အာဏာရှိတယ်ဆိုတာ မဟုတ်ဘူး။ စစ်တပ်က အာဏာမက်တယ်ဆိုတာလည်း မဟုတ်ဘူး။ ဖွဲ့စည်းပုံ ကိုလည်း သေချာနားမလည်၊ လုပ်ပိုင်ခွင့်တွေကိုလည်း သေချာ မလေ့လာဘဲနဲ့ သူတို့ပြောနေတာ။ တပ်မတော်သားတွေ အသက်စွန့် နေကြတာ ပြည်သူလူထုတွေအတွက်ပါပဲ။ နိုင်ငံရေးသမားတွေ လှုပ်ရှားလို့ လူထုပဲ အ သေခံလာခဲ့ရတာ။ သူတို့ တယောက်မှ မသေဘူးလေ။ တပ်ကထွက်ဆိုတာဗျာ ကျနော်လည်း တပ်ကထွက်လာခဲ့ပြီး နိုင်ငံရေး လုပ်နေတာပဲ။ လွှတ်တော်ထဲမှာ တပ်က ရှိနေတာ တကယ်တော့ ဖွဲ့စည်းပုံ အခြေခံဥပဒေရယ်၊ ဒို့တာဝန်အရေး ၃ ပါးကို စောင့်ကြည့်တဲ့အနေအထားပါ။ သူတို့က နိုင်ငံရေး လုပ်တာမဟုတ်ပါဘူး။ တပ်က ထွက်လာတဲ့လူတွေ လုပ်နေကြတာပါ။ ဒါကလည်း နိုင်ငံရေး လုပ်ချင်လို့ ကျနော်တို့လည်း ထွက်လာတာပဲလေ။ အချိန်တန်ရင် လွှတ်တော်ထဲက တပ်မတော်သားတွေက ထွက်သွားမှာပဲ။ ဖွဲ့စည်းပုံပြင်ရေးဆိုတာ ပြည်ထောင်စုလွှတ်တော်က လုပ်မှ ရတာ။ ဘေးကနေ ဘယ်သူအော်အော် မရပါဘူး။ ကဲ ၈၈ ကလို လုပ်ချင်လား။ အဲဒါဆို ရင်တော့ တပ်က ပြန်သိမ်းမှာပေါ့ဗျာ။ ဒါပဲရှိတာပဲ။ အခုလို ဒီမိုကရေစီဆိုပြီး လူထုအားနဲ့ လုပ်နေတာ စစ်တပ်ကို ဖိအားပေးနေတဲ့ သဘောပဲဗျာ။ အဲဒီလိုသာဆို စစ်အုပ်ချုပ် ရေး ပြန်ရောက်သွားမှာပေါ့။ အဲဒါကြောင့် နိုင်ငံသားတွေလည်း ဘယ်သူမှ အကျိုးမရှိဘူး။ စစ်တပ်အတွက်လည်း အကျိုး မရှိဘူး။ (ဧရာဝတီ - ၁၉၊၅၊၂၀၁၄ )
သုံးသပ်ချက် - ဟားဟားဟား..ဦးမင်းဆွေ..ကျုပ်တို့ပြည်သူတွေကို ချိန်းခြောက်နေတာလား။ အာဏာပြန်သိမ်းချင်တာလား သတ္တိရှိရင် သိမ်းကြည့်လိုက်လေ။ စစ်တပ်က အာဏာမရှိဘူးဆိုရင် ဘာကြောင့် ပြည်သူက မရွေးချယ်ဘဲနဲ့ လွှတ်တော်ထဲမှာ အချောင်ဝင်ထိုင်နေတာလဲ။ ခင်ဗျားက တိုင်းပြည်ကို ချစ်လွန်းလို့ စစ်တပ်က ထွက်ပြီး နိုင်ငံရေးလုပ်တာမဟုတ်ဘူး။ ခင်ဗျားတို့ အဖေကြီး ဗိုလ်သန်းရွှေ ရဲ့အမိန့်အရ နိုင်ငံရေးလုပ်စားနေတာပါ။ ခင်ဗျားလည်း ဘာထူးလဲ မဲလိမ်၊မဲခိုးပြီးတော့ လွှတ်တော်အမတ်ဖြစ်နေတာ မဟုတ်ဘူးလား။
ဗိုလ်မှူးချုပ်တင့်ဆန်း
တပ်မတော်သား ပြည်သူ့လွှတ်တော်ကိုယ်စားလှယ် ခေါင်းဆောင်
ဒေါ်အောင်ဆန်း စုကြည်ရဲ့ တပ်မတော် အပေါ်ကို ပြောဆို တိုက်တွန်းတဲ့စကားတွေက မရိုးသားတဲ့အပြင် ဖွဲ့စည်းပုံ ကို ပြင်ချင်တာက ဒေါ်အောင်ဆန်းစုကြည် အနေနဲ့ သမ္မတဖြစ်ချင်လို့ ပြင်ချင်တာလို့ ဆိုပါတယ်။ “သူ့အမြင်ကိုက မရိုးသားဘူး။ အခု သူတို့ဇောင်းတင်နေတာက သူတို့သမ္မတဖြစ်ရေး၊ ပုဒ်မ ၄၃၆ တို့ကိုတင်နေတာ။ အမှန် က ပုဒ်မ တခုချင်းစီပေါ်မှာ သုံးသပ်ပြီးတော့ ပြင်သင့်၊ မပြင်သင့် စဉ်းစားရမှာ” လို့ ဗိုလ်မှူးချုပ်တင့်ဆန်းက ပြောပါတယ်။ တပ်မတော်အနေနဲ့ ပါတီစွဲ၊ ပုဂ္ဂိုလ်စွဲမရှိဘဲ ပြည်သူ့အကျိုးကိုသာ အစဉ်ဆောင်ရွက်တဲ့ အဖွဲ့အစည်းဖြစ်တဲ့အပြင် အများအတွက် အလုပ်လုပ်နေတဲ့ အဖွဲ့အစည်းဖြစ်ကြောင်း၊ ဖွဲ့စည်းပုံ အခြေခံ ဥပဒေ ပြင်ဆင်ရေး လွှတ်တော် ကော်မတီမှာ တပ်မတော်သားတွေပါဝင်နေတာမို့ အပြည့်အ၀ ပူးပေါင်းနေဆိုတာ သိသာကြောင်း၊ ဒေါ်အောင်ဆန်းစုကြည် အနေနဲ့ တပ်မတော်အပေါ်မှာ အမြင်မှားတွေရှိနေကြောင်း၊ လက်ရှိ သမိုင်းကြောင်းအရ တပ်မတော်အနေနဲ့ အခြေခံဥပဒေ အရ ပါဝင်ဖို့ လိုအပ်နေလို့ ပါဝင်တာဖြစ်ကြောင်း သူက ဆက်လက်ပြောဆိုပါတယ်။ “တပ်က ပူးပေါင်းပါဝင်ရမယ် ဆိုတာ ဘယ်လို ပါဝင်ရမှာလဲ။ ကော်မတီထဲမှာ ပါပြီးသားဆိုတော့ မေးစရာတောင်မလိုဘူး။ သူ(ဒေါ်အောင်ဆန်းစုကြည်) က မှားနေတာ။ တပ်မတော်ဆိုတာ လွတ်လပ်ရေးအတွက် ပေါ်ထွက်လာတဲ့ တပ်မတော်ပါ။ သမိုင်းကြောင်းရှိတယ်။ ကိုယ့်နိုင်ငံမှာ တပ်မ တော်က တာဝန်ယူ ထိမ်းသိမ်းစောင့်ရှောက်ခဲ့ရတာ အများကြီးပဲ။ ၂၅ ရာခိုင်နှုန်း ဘာကြောင့် ပါရလဲ ဆိုတာ အဲဒီပေါ် မူတည် ပြီးမှ ဆုံးဖြတ်ကြပါလို့ ပြောချင်တယ်” လို့ သူက ဆိုပါတယ်။ (ဧရာဝတီ - ၁၂၊၅၊၂၀၁၄)
သုံးသပ်ချက် - ဗိုလ်တင့်ဆန်းရေ..ခင်ဗျားရဲ့ စကားထဲမှာကိုက မရိုးသားတဲ့စကားတွေပါနေတယ်။ ၅၉ (စ) ကိုပြင်လိုက်ရင် ဒေါ်အောင်ဆန်း စုကြည် သမ္မတ ဖြစ်မှာကို သိနေလို့ ခင်ဗျားတို့ တတွေ ယုတ်မာပြီးတော့ မပြင်ရဲတာမဟုတ်လား။ ဒေါ်အောင်ဆန်းစုကြည်က မရိုးသားတာ မဟုတ်ဘူး။ ခင်ဗျားတို့ စစ်ဗိုလ်တွေရော၊ စစ်ဗိုလ်လူထွက် ချိတ်ထမီဝတ် စစ်သားကြီးတွေကိုယ်တိုင်ကိုက မိန်းမသားဖြစ်တဲ့ ဒေါ်အောင်ဆန်းစုကြည်ကို ကြောက်ရွံ့ နေကြတယ်ဆိုတာကို ဝင်ခံလိုက်စမ်းပါဗျာ။ အရင်က လွတ်လပ်ရေးကို ပြည်သူနဲ့ပူးပေါင်းပြီး အရယူ ပေးခဲ့တဲ့ တပ်မတော်က ပြည်သူတပ်မတော်။ အခုက ပြည်သူကို ညှဉ်းပမ်းနှိမ်စက် နေတဲ့ သတ်မတော်။
အငြိမ်းစားဗိုလ်မှူးကြီး ဦးမင်းဆွေက
ကြံ့ခိုင်ရေးပါတီရဲ့ ဒိုက်ဦးမြို့နယ် ပြည်သူ့လွှတ်တ်ာကိုယ်စားလှယ်
ဦးမင်းဆွေက ဖွဲ့စည်းပုံ အခြေခံဥပဒေကို ပြင်ဆင်လိုက်ရင် တိုင်းပြည် အစိတ်စိတ်အမွှာမွှာ ကွဲသွားမယ်လို့ ဆိုပါတယ်။ “သူတို့ပြောနေတဲ့ ဖွဲ့စည်းပုံအခြေခံ ဥပဒေကို သူတို့ပြောတဲ့အတိုင်း ပြင်လိုက်ရင် မြန်မာနိုင်ငံက အစိတ်စိတ် အမွှာမွှာ ပြိုကွဲသွားမှာပေါ့။ လက်ရှိအခြေအနေနဲ့ကတော့ လုံးဝကို မပြင်သင့်ဘူးလို့ မြင်တာပဲ။ တပ်မတော်က ပြည်သူအတွက်ပါပဲ။ ဒါပေမယ့် ကာကွယ်ရေး ဦးစီးချုပ်အနေနဲ့ ဖွဲ့စည်းပုံ ပြင်ဖို့မှာ ဘယ်လောက် စွန့်စားရဲ မလဲ။ လိုက်လျောလိုက်လို့ တခုခု ဖြစ်ရင် ဘယ်လိုလုပ်မလဲ။ တပ်အနေနဲ့က ဒို့တာဝန်အရေး ၃ ပါးကို ဘယ်လောက်ထိ စိတ်ချရမလဲဆိုတာပေါ်မူတည်ပြီး လိုက်လျောသင့်တာ လိုက်လျောမှာ” လို့ သူက ဆိုပါတယ်။ လက်ရှိ ပြည်သူတွေအနေနဲ့ ဖွဲ့စည်းပုံအခြေခံ ဥပဒေကို ပြင်ဆင်ပေးဖို့က စိတ်ဝင်စား နားလည်မှု မရှိဘဲ စားဝတ်နေ ရေးနှင့် ဖွံ့ဖြိုးတိုးတက်ရေးကိစ္စတွေကိုသာ စိတ်ဝင်စားတယ်လို့ ဦးမင်းဆွေက ဆက်ပြောတယ်။ (ဧရာဝတီ - ၁၂၊၅၊၂၀၁၄)
သုံးသပ်ချက် - ဘာမဟုတ်တာတွေပြောနေတာလဲ ဦးမင်းဆွေ။ အခု တိုင်းပြည်ငြိမ်းချမ်းရေးမရတာက ဖွဲ့စည်းပုံမပြင်ပေးတဲ့အတွက် တိုင်းရင်းသားလက်နက်ကိုင်တွေက မကြေနပ်လို့ လက်မှတ်မထိုးကြတာ။ ငဖယ် ကပြောင်းပြန်လာလုပ်နေတယ်။ အဲဒီ နာဂစ် ဖွဲ့စည်းပုံကို မပြင်ရင် တသက်လုံး ငြိမ်းချမ်းရေးမရတဲ့အပြင် အမျိုးသားပြန်လည် သင့်မြတ်ရေးလည်း ဖြစ်မလာတော့ဘူးဆိုတာကိုတော့ သတိပေးချင်ပါတယ်။
အားလုံးကိုလေးစားလျက်
ဝင်းလှိုင်
No comments:
Post a Comment