အလုပ်ပြောင်းမည့် အီးနိုင်းကိုကိုများ အလုပ်ထောက်ပံ့ရေးဌာန သို့ အချိန်မှီ သတင်းပို့ရန် လိုပါသည်

မနေ့ မနက်ပိုင်းက အီးနိုင်း ကိုကိုတစ်ယောက် ဖုန်းဆက်ပြီး အကူအညီတောင်းပါတယ် ။ အကြောင်းက သူ မြန်မာပြည်ကို ခွင့်ပြန်သွားတယ် ။ ဟိုမှာ ၃ လ နေခဲ့တယ် ။ ပြန်လာပြီး အလုပ်ထောက်ပံ့ရေးဌာန (고용 지원센터) သွားတော့ ဟိုက လက်မခံဘူး ။ မောင်းထုတ်လိုက်သတဲ့ ။ မြန်မာပြည်ပြန်တော့လို့ ပြောသတဲ့ ။ သူဘာဆက်လုပ်ရမယ်ဆိုတာ မသိလို့ အကြံညာဏ် တောင်းခံရခြင်း ဖြစ်ပါသတဲ့ ။

မေးကြည့်တော့ ၊ ဗီဇာက ၁ နှစ်ကျော်ကျော်ရှိသေးတယ် ။ အလုပ်ရှင်က စာချုပ်သက်တမ်း ၂ နှစ်ချုပ်ပြီး ဗီဇာ ကိုလည်း ၂ နှစ်တောင် တိုးထားပေးတာပါ ။ မြန်မာပြည် ခဏပြန်ဖို့ ခွင့်တောင်းတော့ သူဌေးက ခွင့်မပေးလို့ ၊ အရပ်ကူပါ လူဝိုင်းပါ လုပ်ပြီး အလုပ်က ထွက်ခွင့်ရသွားတာ ။ ထွက်ခွင့်ရပြီး ၊ မြန်မာပြည် ခဏ ပြန်လည်သတဲ့ ။ ဟိုမှာ ရက် ၉၀ ။

ညဖက်ပိုင်း ရောက်တော့ နောက်တစ်ယောက် လာပြန်တယ် ။ သူလည်း ခွင့်ပြန်မလို့ ။ အားလုံးစီစဉ်ပြီးပါပြီတဲ့ ။ ဒီနေ့ ပြန်မလို့ပေါ့ ။ လေယာဉ်လက်မှတ် အိုကေ လုပ်ပြီးပြီတဲ့ ။ သူဘာတွေ လုပ်ဖို့လိုမလဲလို့ ဆိုပြီး မေးတဲ့သဘောပါ ။ အလုပ်ရှင်ရဲ့ ခွင့်ပြုချက်ရသလားလို့ မေးကြည့်တော့ ၊ အလည် ခွင့်မပေးလို့ ထွက်ခွင့်တောင်းလိုက်တယ်တဲ့ ။ ထွက်စာရထား ပါတယ်တဲ့ ။

ဒီနေ့ ညနေပိုင်း ၊ နောက် ၁ ယောက်ကတော့ တစ်မျိုးပါ ။ သူက စာချုပ် နှစ်ပြည့်ပြီး ၊ အလုပ်ပြောင်းမလို့ ထွက်ထားတဲ့သူ ။ ကိုယ့်အစီအစဉ်နှင့်ကိုယ် အလုပ်ရှာနေပါသတဲ့ ။ အလုပ်မရှိ နေစရာ ထိုင်စရာလည်း အဆင်သင့်ဆိုတော့ တော်တော် အဆင်ပြေနေပုံရပါတယ် ။ အခု ၁ လကျော် ကြာနေပြီတဲ့ ။ လူဝင်မှုကြီးကြပ်ရေးရုံးသွားသတင်းပို့တော့ ဗီဇာ ၃ လရထားပါသတဲ့ ။ သူများတွေပြောလို့ ဒီနေ့ အလုပ်ထောက်ပံ့ရေးဌာန (고용 지원센터) ကိုသွားပြီး အလုပ်စုံစမ်းဖို့သွားသတဲ့ ။ ဟိုရောက်တော့ လိုအပ်သည်များ မေးမြန်းတယ်ထင်ပါတယ် ။ အလုပ်ထွက်ထားတာ ၁ လကျော်ဖြစ်နေတော့ အလုပ်ရှာပေးလို့ မရတော့ဘူးလို့ ပြောလွတ်လိုက်သတဲ့ ။ အခုမှ ဘာလုပ်ရမှန်း မသိလို့ မေးတဲ့ သဘောပါ ။

အဲသည် ပြဿနာတွေနှင့် ပတ်သက်ပြီး ၊ မှတ်ချင် သိချင်သူများရှိလျင် သိရှိ မှတ်သားနိုင်ကြစေဖို့ ကျနော် ကြိုးစားပြီး ၊ တင်ပြပါ့မယ် ။

ကိုရီးယား လူဝင်မှုကြီးကြပ်ရေး ဥပဒေ ပုဒ်မ ၂၁ မှာ ၊ နိုင်ငံခြားသား အလုပ်သမား ဖြစ်ပါက အလုပ်ရှင်နှင့်အလုပ်စာချုပ်ဖျက်သိမ်းခြင်း စသည့် အလုပ်နေရာ ပြောင်းရွှေ့ရခြင်းအကြောင်း (ပုဒ်မ-၂၅) ရှိလာပါက ၊ အလုပ်သမားဝန်ကြီးဌာန အလုပ်အကိုင်ထောက်ပံ့ရေးဌာနတွင် အလုပ်နေရာပြောင်းရွှေ့လိုကြောင်း လျှောက်ထားပြီး ခွင့်ပြုချက်ရပါက အခြားသော အလုပ်နေရာသို့ ပြောင်းရွှေ့နိုင်သည် လို့ ပြဋ္ဌာန်းထားပါတယ် ။

နောက် ၊ နိုင်ငံခြားအလုပ်သမားငှားရမ်းခြင်းအစရှိသည်များဆိုင်ရာဥပဒေ ပုဒ်မ ၂၅ ၊ ပုဒ်မခွဲ ၁ နှင့် ၃ ၊ နိုင်ငံခြားအလုပ်သမားငှားရမ်းခြင်းအစရှိသည်များဆိုင်ရာ နည်းဥပဒေ ပုဒ်မ ၃၀ ပုဒ်မခွဲ ၁ တို့အရ အလုပ်စာချုပ်သက်တမ်း ကုန်ဆုံးပြီး သို့မဟုတ် အလုပ်စာချုပ်ကို ဖျက်သိမ်းပြီး ပါက အလုပ်မရှိသူဖြစ်ကြောင်း သက်ဆိုင်ရာ အလုပ်ထောက်ပံ့ရေးဌာနသို့ ၁ လ အတွင်း သတင်းပို့ပြီး အလုပ်ရှာဖွေသူ (구직자) အဖြစ် မှတ်ပုံတင်ရမှာ ဖြစ်ပါတယ် ။

အထက်မှာ ဖော်ပြခဲ့တဲ့ ညီငယ် အီးနိုင်းကိုကို ၃ ယောက်စလုံးမှာ တူညီတဲ့ အမှားတစ်ခု ရှိနေပါတယ် ။ သူတို့ သက်ဆိုင်ရာ အလုပ်ထောက်ပံ့ရေးဌာနသို့ ၁လ အတွင်း သတင်းပို့ရန် ပျက်ကွက်နေကြခြင်းပါ ။

အဲသည် ပျက်ကွက်မှုများအတွက် ကုစားရန် ဆေးမရှိသေးဘူး လို့ထင်ပါတယ် ။ ညီငယ်တစ်စု အသိ တစ်ခု လစ်ဟာမှုကြောင့် ဘဝနှင့်ရင်းပြီး ရထားတဲ့ အတွေ့အကြုံ အဖြစ်အပျက်ကလေးကို နှောင်းညီငယ်တို့ မှတ်သားထားကြနိုင်ဖို့ တင်ပြလိုက်ရပါတယ် ။

အလုပ်ပြောင်းမည် ဆိုလျင် သက်ဆိုင်ရာ အလုပ်ထောက်ပံ့ရေးဌာနသို့ ၁ လအတွင်း သတင်းပိုရန် မမေ့ပါနှင့်

ကျေးဇူးတင်ပါတယ် ။

လေးစားမှုဖြင့် -

ကိုဝိုင်း (မိုးညှင်း)
၂၀၁၁-၀၄-၂၉